նախընտրելի դարձնել«Կասպերսկու լաբորատորիա»-ն նոր թիրախային հարձակում է հայտնաբերել Ռուսաստանի, Հայաստանի եւ Մալայզիայի ֆինանսական կազմակերպությունների վրա, նշված է ընկերության հաղորդագրության մեջ: Այս մասին հայտնում է «Փրայմը»:
«Հարձակումների առաջին ալիքը տեղի է ունեցել 2017 թվականի հուլիսին, իսկ նոր հարձակումները հիմա են կատարվում: Իր աննկատելի եւ քողարկված լինելու պատճառով հարձակումը անվանել են Silence»,- հայտնում են «Կասպերսկու լաբորատորիա»-ից:
Ընկերության փորձագետների խոսքով՝ վարակումը տեղի է ունենում թիրախային ֆիշինգային վնասաբեր նամակների միջոցով: Նամակները .chm. ֆորմատի վնասաբեր ներդիրներ ունեն: Հաճախ նամակի տեքստը հաշիվ բացելու ստանդարտ հարցման է նման, պարզաբանել են ընկերությունից:
Նամակը բացելու հետեւանքով վիրուսը հայտնվում է կորպորատիվ ցանց. խարդախները բանկի ենթակառուցվածքն ուսումնասիրելու, ինչպես նաեւ աշխատակիցներին հետեւելու հնարավորություն են ստանում, մասնավորապես՝ մոնիտորների վրա տեղադրված տեսախցիկների միջոցով: Տվյալների ուսումնասիրությունից եւ վերլուծությունից հետո հաքերներն իրականացնում են փողի հափշտակում կամ փոխանցում:
