Հայաստանը, հանդիսանալով ԵՏՄ անդամ երկրներից միակը, որը ցամաքային սահման ունի բարեկամ Իրանի հետ, կարող է դարպաս հանդիսանալ դեպի ԵՏՄ, ԱՊՀ եւ ԵՄ երկրներ մուտք գործելու համար: Այս մասին, այսօր՝ նոյեմբերի 28-ին, հայ-իրանական գործարար համաժողովի ժամանակ իր ելույթում նշել է ՀՀ ԱԳ նախարար Էդվարդ Նալբանդյանը:

Նա, մասնավորապես, նշել է.

«Ջերմորեն ողջունում եմ արդեն ավանդական դարձած հայ-իրանական գործարար համաժողովի բոլոր մասնակիցներին:

Նման համաժողովները կարեւոր հարթակ են մեր երկու երկրների պետական ու գործարար շրջանակների ներկայացուցիչների համար՝ քննարկելու երկկողմ առեւտրատնտեսական ոլորտում առկա հնարավորությունները եւ խնդիրները, ուղենշելու մեր երկրների միջեւ համագործակցության խթանման նպատակով ձեռնարկվելիք քայլերը։

Հուսով եմ, որ այս համաժողովը կնպաստի իրանական գործարար շրջանակների կողմից Հայաստանի ներդրումային հնարավորությունների բացահայտմանը:

Հարգելի՛ գործարարներ,

Այսօր Հայաստանում ստեղծված են բարենպաստ պայմաններ, որոնք թույլ են տալիս շահավետ ներդրումներ կատարելու եւ հաջողությամբ գործարարությամբ զբաղվելու համար։ Հայաստանում իրականացվող բարեփոխումները նախատեսում են ամրագրել առավել բարենպաստության ռեժիմներ, հստակեցնել օտարերկրյա ներդրողներին տրվող երաշխիքները, հնարավորություն տալ գործարարներին օգտվելու Հայաստանում գործող եւ նախատեսվող լրացուցիչ արտոնություններից, ներդրումային վեճերի լուծման ժամանակակից մեխանիզմներից, հետեւողականորեն կրճատվել եւ պարզեցվում են մի շարք ընթացակարգեր։

Հայաստանում ներդրումներ կատարելու առավելություններից է, որ մեր երկիրն ունի առեւտրի արտոնյալ ռեժիմ բազմաթիվ երկրների հետ: Մասնավորապես, Եվրասիական տնտեսական միությանը Հայաստանի անդամակցությամբ ստեղծվել են նոր հնարավորություններ: Հայաստանում արտադրված ապրանքները զրոյական մաքսատուրքերով, առանց վարչարարական խոչընդոտների, կարող են ազատ մուտք գործել Եվրասիական տնտեսական միության անդամ երկրների 180 միլիոնանոց սպառողական շուկա: Բացի այդ, մեր երկիրն ունի ազատ առեւտրի համաձայնագրեր ԱՊՀ գրեթե բոլոր երկրների հետ։ Հայաստանն օգտվում է նաեւ ԱՄՆ-ի, Կանադայի, Շվեյցարիայի, Ճապոնիայի, Նորվեգիայի «Արտոնությունների ընդհանրացված GSP համակարգերից», Եվրամիության կողմից տրամադրվող «Արտոնությունների ընդհանրացված համալրված GSP+ համակարգից»:

Հայաստանը, հանդիսանալով ԵՏՄ անդամ երկրներից միակը, որը ցամաքային սահման ունի բարեկամ Իրանի հետ, կարող է դարպաս հանդիսանալ դեպի ԵՏՄ, ԱՊՀ եւ ԵՄ երկրներ մուտք գործելու համար: Այս առումով կարեւորում ենք իրականացման փուլում գտնվող Հյուսիս-հարավ ճանապարհային միջանցքի նշանակությունը՝ որպես Պարսից ծոցի նավահանգիստները Սեւ ծովի նավահանգիստներին կապող ամենակարճ տարանցիկ երթուղի:

Հայաստանն ակտիվորեն աջակցում է ԵԱՏՄ-ի եւ բարեկամ Իրանի միջեւ ազատ առեւտրի գոտու մասին համաձայնագրի կնքումը:

2017թ. մարտի 30-ին ՀՀ կառավարությունը որոշում է ընդունել Սյունիքում՝ ԻԻՀ սահմանագծին ազատ տնտեսական գոտի ստեղծելու մասին, որի գործարկումը կնպաստի ԻԻՀ հետ տնտեսական կապերի ամրապնդմանը, ՀՀ տնտեսական ներուժի առավել արդյունավետ օգտագործմանը: Երկու երկրների պատկան մարմինների կողմից ստորագրվել է Փոխընմռնման հուշագիր, որի նպատակն է սահմանել Հայաստանի եւ Իրանի միջեւ ազատ տնտեսական գոտիների ոլորտում համագործակցության հիմնական ուղղությունները, կապեր ստեղծել «Մեղրի» ազատ տնտեսական գոտու եւ «Արաս» ազատ տնտեսական գոտու տարածքներում գործունեություն իրականացնող ընկերությունների, ինչպես նաեւ կառավարող մարմինների միջեւ:

Հարգելի՛ ներկաներ,

Հուսով եմ, որ այս համաժողովը կնպաստի մեր երկրների տնտեսական համագործակցության հնարավորությունների եւ լավագույն ձեւաչափերի նախանշմանը։

Մաղթում եմ համաժողովի մասնակիցներին արդյունավետ աշխատանք։

Շնորհակալություն»: