նախընտրելի դարձնել
Դեկտեմբերի 23-ին գումարվել է Երեւանի ավագանու չորրորդ նստաշրջանի վերջին նիստը, որը հաստատել է Երեւանի 2011 թվականի բյուջեն:
Երեւանի 2011թ. բյուջեի եկամուտները նախատեսված են 55 մլրդ 796 մլն դրամ, ծախսերը՝ 58 մլրդ 296 մլն դրամ։ 2 մլրդ 500 մլն դրամ պակասուրդն ամբողջությամբ ֆինանսավորվելու է տարեսկզբի ազատ մնացորդի հաշվին։ Երեւանի պահուստային ֆոնդի համար նախատեսված է մոտ 4 մլրդ դրամ։ Նախորդ տարվա համեմատ մոտ 6,7 տոկոսով ավելացել է եկամտային մասը։ Հարկային մուտքերն ու սեփական եկամուտները եւս 14 տոկոսով ավելի են նախատեսված։
Երեւանի քաղաքապետ Կարեն Կարապետյանի գնահատմամբ` բյուջեի եկամտային մասը մեղմ է պլանավորված: Մասնավորապես, քաղաքապետը նշեց, որ ապառքների արդյունավետ կառավարման շնորհիվ հնարավոր է ավելի մեծ եկամուտ ակնկալել։ Նիստի ընթացքում Երեւանի ավագանու կողմից գույքահարկի արտոնություններ տրվեցին ստեղծագործական միավորումներին եւ որոշակի թվով ֆիզիկական անձանց:
