նախընտրելի դարձնել
Հայաստանում Ֆրանսիայի արտակարգ եւ լիազոր դեսպան Անրի Ռենոյի հարցազրույցը NEWS.am լրատվական գործակալությանը:
Ինչպե՞ս կգնահատեիք 2010 թվականը, ո՞ր իրադարձություններն ավելի հիշարժան կհամարեիք: Ձեր կարծիքով, 2010-ն ինչ դեր ունեցավ հայ-ֆրանսիական հարաբերություններում:
2010-ին համաշխարհային տնտեսության աճը շարունակվեց, որն անշուշտ մեծ դաս էր ընթացիկ տարվա համար, անգամ եթե անելիքները շատ են: Ինչ վերաբերում է ֆրանս-հայկական հարաբերություններին, ապա վերջիններս մեծ լիցք ստացան գրեթե բոլոր ոլորտներում: 2010-ի մարտին Նախագահ Սարգսյանի Փարզ կատարած այցը մեր քաղաքական երկխոսության նշանակալի պահ էր: Այդ այցելությունը նախորդվել էր ՀՀ պաշտպանության նախարարի Ֆրանսիա կատարած այցով: Տնտեսական առումով «Օրանժ-Արմենիա»-ն մեծ վերելք գրանցեց եւ հուսով եմ այն կամրապնդվի: Հեկտեմբերին Երեւանում կայացած Ապակենտրոնացված համագործակցության ֆրանս-հայկական ֆորումն էլ իր հերթին նոր լիցք հաղորդեց երկու երկրների քաղաքների, համայնքների եւ շրջանների միջեւ առկա արդեն իսկ ընդգծված շփումներին:
Ի՞նչ սպասումներ եւ հույսեր ունեք 2011-ի համար: Ինչ նոր ծրագրեր, գործողություններ եք նախատեսում իրականացնել Նոր տարում:
Ցանկանում եմ, որ վերականգնվեն համաշխարհային տնտեսության հավասարակշռությունները եւ որ այն վերագտնի հավասար առաջընթացի ուղին: Ֆրանսիան իր ողջ ուժով կօժանդակի դրան մասնավորապես նոյեմբերի 12-ից ստանձնած Մեծ քսանյակի իր ստանձնած նախագահության միջոցով: Առաքելության գլխավոր նապատակները կլինեն՝ միջազգային դրամավարկային բարեփոխումները, հումքի առեւտրի կայունացումը եւ միջազգային կառույցների կառավարման բարելավումը: Ֆրանսիայի եւ Հայաստանի հարաբերությունների առնչությամբ, Ֆրանկոֆոնիայի օրերը, Երաժշտության տոնը, նաեւ 2011-ի հոկեմբերին կայանալիք Ֆրանկոֆոն քաղաքապետերի միջազգային ասոցիացիայի երեւանյան համաժողովը կլինեն այդ հարաբերությունների հիշարժան պահեր:
Ամանորյա արձակուրդներն ինչպե՞ս եք անցկացնելու: մեկնելու եք ուղեւորությա՞ն, թե՞ մնալու եք Հայաստանում:
Տոներն անցկացնելու եմ Ֆրանսիայում, ընտանիքիս հետ, իմ ծննդավայր Բյուգեում, Ալպերի հարեւանությամբ: Հուսով եմ ձյուն կլինի եւ նույնքան գեղեցիկ արեւ, քան այն արեւը, որ ինձ պարգեւեց Հայաստանը հոկտեմբերից ի վեր Հայաստանում գտնվելուս ողջ ընթացքում: Երեւանում կլինեմ հայկական Սուրբ Ծննդյան տոնին:
Ի՞նչ կմաղթեիք հայ ժողովրդին:.
Մաղթում եմ Հայաստանին առաջընթաց Լեռնային Ղարաբաղի հակամարտության կարգավորման բանակցված լուծում գտնելու գործընթացում, որ Հայաստանում տնտեսական ուժեղ առաջընթաց գրանցվի, որ վճռականորեն հետամուտ լինի իր արդիականացման եւ Եվրոպայի հետ մերձեցման գործընթացին: Հայաստանը հաղթաթղթերի պակաս չի զգում եւ անչափ շատ տաղանդներ ունի: Ես տպավորված եմ իր եւ իր ապագայի՝ երիտասարդների նկատմամբ Հայաստանի ունեցած հավատով: Երիտասարդները Հայաստանի ապագան են:
