Շվեյցարիայի խորհրդարանի նախագահի ու իր գլխավորած պատվիրակության անդամների հետ հանդիպումը շատ հագեցած եւ հետաքրքիր է անցել: Այս մասին ՀՀ խորհրդարանի նախագահ Արա Բաբլոյանը հայտարարել է Հայաստանի Ազգային ժողովում Շվեյցարիայի խորհրդարանի Ստորին պալատի նախագահ Դոմինիկ դե Բումանի հետ համատեղ ասուլիսի ժամանակ:

Նրա խոսքով` հանդիպման ընթացքում քննարկվել են վերջին տարիների հայ-շվեյցարական հարաբերությունների հարցերը: «Քննարկվել են նաեւ երկու երկրների խորհրդարանների միջեւ երկկողմ համագործակցության հարցեր: Խորհրդարանական բարեկամության խմբերի ակտիվ համագործակցությունը չափազանց կարեւոր է»,- նշել է Բաբլոյանը:

ՀՀ խորհրդարանի ղեկավարը նաեւ շեշտել է, որ անդրադարձ է եղել միջխորհրդարանական կազմակերպությունների շրջանակներում երկկողմ համագործակցության հարցերին:

Նա բարձր է գնահատել Շվեյցարիայի խորհրդարանի Ստորին պալատի ղեկավարի ներդրումը հայ-շվեյցարական հարաբերությունների զարգացման գործում: Բաբլոյանը նշել է, որ երկու երկրների միջեւ համագործակցության համար եւս մեկ կարեւոր հարթակ կարող է դառնալ այս տարի աշնանը Հայաստանում կայանալիք Ֆրանկոֆոնիայի գագաթնաժողովը: ՀՀ խորհրդարանի նախագահը նաեւ հայտնել է, որ հանդիպման ընթացքում քննարկվել են Հայոց ցեղասպանության միջազգային ճանաչման հարցը եւ հայ-թուրքական հարաբերությունները: Բաբլոյանը հայտարարել է, որ շվեյցարական պատվիրակության հետ քննարկվել է ղարաբաղյան հակամարտության կարգավորման հարցը: