նախընտրելի դարձնել
Հայտնի են դարձել Ադրբեջանի Գաբալայի ռադիոլոկացիոն կայանում ռուս սպայի սպանության մանրամասները:
Սպանությունը կատարվել է Նոր տարվա գիշերը, հայտնում է ադրբեջանական APA գործակալությունը:
Հետաքննության արդյունքում պարզվել է, որ կայանում ծառայող սպաների խումբը Նոր տարին նշելու համար հավաքվել է մայոր Սերգեյ Միխայլովիչ Գրաչեւի տանը: Կերուխումից հետո հյուրերի եւ տանտիրոջ միջեւ վեճ է սկսվել, որի պատճառներն առայժմ հայտնի չեն: Արդյունքում սպաները սպանել են Գրաչեւին, գողացել նրա փողերը, ոսկեղենը եւ փախուստի դիմել: Սպանության մասին լուրն իրավապահ մարմինները ստացել են հունվարի 2-ին: Դեպքի վայր հասած իրավապահները գտել են Սերգեյ Գրաչեւի գլխատված մարմինը:
Նախաքննության ընթացքում պարզվել է, որ երկու երեխաների հայր Գրաչեւը մի քանի տարի առաջ բաժանվել է ընտանիքից եւ մեկ տարի էր, ինչ մենակ էր ապրում:
Գաբալայում ներկայումս գտնվում է Ռուսաստանի զինվորական դատախազության աշխատակիցների խումբը:
Ինչպես ավելի վաղ հայտնել էր NEWS.am-ը, Ադրբեջանի զինվորական դատախազությունը քրեական գործ է հարուցել ռուս սպայի սպանության շուրջ:
