Լեռնային Ղարաբաղի հակամարտության կարգավորման հարցում Ռուսաստանի դիրքորոշումը հայտնի է եւ չի փոխվել: Մարտի 2-ին ճեպազրույցի ժամանակ այս մասին ասել է ՌԴ արտաքին գործերի նախարարության պաշտոնական ներկայացուցիչ Մարիա Զախարովան: Զախարովան հիշեցրել է, որ Ռուսաստանի Դաշնության դիրքորոշումը ներկայացված է փաստաթղթերում, որոնք հասանելի են նաեւ Ռուսաստանի ԱԳՆ-ի կայքում: «Եթե որեւէ նրբերանգում կամ իրադարձությունների զարգացում լինի, մենք կտեղեկացնենք»,- նշել է Մարիա Զախարովան՝ պատասխանելով հարցին, թե ինչպես է Ռուսաստանը վերաբերվում Լեռնային Ղարաբաղին բանակցային սեղանի շուրջ վերադարձնելու հարցին:

Հիշեցնենք, որ ԵԱՀԿ Մինսկի խմբի համանախագահները բազմիցս հայտարարել են որոշակի փուլում Լեռնային Ղարաբաղին բանակցային սեղանի շուրջ վերադարձնելու մասին: Միեւնույն ժամանակ, ադրբեջանական լրատվամիջոցները շտապել են Մարիա Զախարովայի հայտարարությունը ներկայացնել իրենց օգտին՝ մեկնաբանելով այն այնպես, որ «Ռուսաստանի ԱԳՆ-ն անհրաժեշտություն չի համարում ԼՂ-ի վերադարձը բանակցային գործընթացին»: