2016 թվականի ապրիլին Ադրբեջանի՝ Ղարաբաղի հետ կապված հույսերը հօդս ցնդեցին: Այս մասին ապրիլի 2-ին լրագրողների հետ հանդիպման ժամանակ հայտարարեց «Ընդդեմ իրավական կամայականության» հասարակական կազմակերպության գործադիր տնօրեն Լարիսա Ալավերդյանը:

Անդրադառնալով ղարաբաղյան կարգավորման գործընթացի ներկայիս փուլին՝ նա ուշադրություն հրավիրեց ԼՂՀ նախագահ Բակո Սահակյանի՝ Վաշինգտոն կատարած այցին: «Այս այցը նախազգուշացում էր, նաեւ՝ Ռուսաստանի համար: Նոր հնարավորություններ բացվեցին, եւ դրանք պետք է հնարավորինս արդյունավետ օգտագործել»,- ասաց Ալավերդյանը:

Միեւնույն ժամանակ, իրավապաշտպանն արձանագրեց, որ ղարաբաղյան հակամարտության կարգավորման վերաբերյալ Մադրիդյան սկզբունքները մինչ օրս չեն փոխվել, իսկ բանակցային գործընթացը փակուղուց դուրս չի բերվել: Ավելին, ՀԿ-ի ղեկավարը վստահ է, որ այս ամսվա ընթացքում Ադրբեջանում կայանալիք նախագահական ընտրությունների արդյունքում այս երկրում մեծ փոփոխություններ չեն լինի, եւ ամեն ինչ հենց դրա մասին է խոսում:

«Ալիեւը պարզապես կանխել է այն հնարավոր իրադարձությունները, որոնք կարող էին վտանգ ներկայացնել իր իշխանության համար», - ասաց Լարիսա Ալավերդյանը՝ վստահություն հայտնելով, որ այս երկրում քաղաքական ճնշումները կտրուկ կավելանան:

Հիշեցնենք, որ մարտի 14-ին Լեռնային Ղարաբաղի Հանրապետության նախագահ Բակո Սահակյանը այցելել էր ԱՄՆ, որտեղ հանդիպում էր ունեցել  մի խումբ ամերիկյան գիտնականների ու փորձագետների հետ: