Երեւանում այցով գտնվող Ռուսաստանի Դաշնության Պետդումայի պատգամավորները պատրաստ են հանդիպել Հայաստանում բողոքի ցույցի առաջնորդ Նիկոլ Փաշինյանի հետ: Այս մասին «Ինտերֆաքս»-ին հայտնել է ՌԴ Պետական դումայի ԱՊՀ գործերով, եվրասիական ինտեգրման եւ հայրենակիցների հետ կապերի կոմիտեի առաջին փոխնախագահ Կոնստանտին Զատուլինը:

«Խնդրում ենք մեզ համար հանդիպում կազմակերպել «Ելք» խմբակցության ղեկավարության, ինչպես նաեւ մյուս բոլոր խմբակցությունների հետ: Եթե Նիկոլ Փաշինյանը պատրաստ է հանդիպել, մենք հաճույքով կհանդիպենք նրա հետ»,- ասել է Զատուլինը: «Որքանով մեզ հայտնի է, այսօր նա Երեւանում չէ, սակայն եթե նա ցանկություն ունենա, մենք բացարձակապես չենք պատրաստվում հրաժարվել հանդիպել», - ասել է նա: Զատուլինը նշել է, որ Պետդումայի մի խումբ պատգամավորներ եւ Դաշնության Խորհրդի անդամները Երեւանում հանդիպում են ունեցել ՀՀ Ազգային ժողովի նախագահ Արա Բաբլոյանի, ինչպես նաեւ ՀՀ-ում Ռուսաստանի Դաշնության դեսպանի հետ:

«Մենք ծանոթանում ենք իրավիճակին, որը զարգանում է, քննարկում ենք խորհրդարանական գործունեության ապագա աշխատանքային պլանը: Բնականաբար, մենք հարցնում ենք, թե ինչ կարելի է ակնկալել »,- պարզաբանել է խորհրդարանականը: