նախընտրելի դարձնելՀՀ երրորդ պաշտոնաթող նախագահ Սերժ Սարգսյանի բնակարանային խնդիրը կառավարությունը կկարգավորի մեկ ամսվա ընթացքում: Այս առնչությամբ ՀՀ վարչապետ Նիկոլ Փաշինյանն այսօր՝ մայիսի 11-ին, կառավարության նիստում վարչապետի աշխատակազմի ղեկավարին հանձնարարեց մեկամսյա ժամկետում ներկայացնել առաջարկություն` Սերժ Սարգսյանին օրենքով սահմանված բնակարանով ապահովելու համար լուծում գտնելու մասին:
Մինչ այդ ՀՀ արդարադատության նախարարի պաշտոնակատար Դավիթ Հարությունյանը զեկուցեց, որ 2018 թ. մարտի 29-ին կառավարությունը որոշում է ընդունել, որով Կոնդի առանձնատների տնտեսության «ՊՈԱԿ»-ի հաշվեկշռում որոշակի շինություն` իր հողամասով, տրամադրվել էր պաշտոնաթող նախագահ Սերժ Սարգսյանին, սակայն ապրիլի 19-ի կառավարության նիստում վարչապետ Սերժ Սարգսյանի հանձնարարականով որոշման համապատասխան կետերն ուժը կորցրած են ճանաչվել` առաջարկելով, որ ընդհանրապես պաշտոնաթող երրորդ նախագահին տրամադրվի բնակարան մյուս կառավարության կողմից, երբ ինքը չի ղեկավարի կառավարությունը:
«Այսօր արդեն կառավարությունն ինքը չի ղեկավարում, ըստ վարչապետի հանձնարարականի` մենք ներկայացնում ենք այս օրինագիծը»,- ասաց Դավիթ Հարությունյանը՝ հավելելով, որ Սերժ Սարգսյանը վերջին պաշտոնաթող նախագահն է, որն օգտվում է այդ օրենքից, որովհետեւ այսուհետ նախագահների համար նման դրույթ չի նախատեսվում:
Նիկոլ Փաշինյանն էլ հավելեց. «Խնդիրը պազ է, տեղի է ունեցել կառավարական առանձնատներից մեկի սեփականաշնորհում եւ հետագա իրադարձությունների արդյունքում հիմա անհրաժեշտություն է առաջացել որոշման այդ հատվածը կոնկրետ կառավարական առանձնատան սեփականաշնորհման մասին չեղյալ հայտարարել եւ գտնել այլ լուծում, որը կապահովի օրենքով նախատեսված երաշխիքը»:
