նախընտրելի դարձնել
Հայաստանի Ազգային ժողովի պաշտոնական կայքը շուտով կներկայանա նաեւ ֆրանսերենով:
ԱԺ մամուլի ծառայությունից NEWS.am-ին հայտնում են, որ կայքէջը դեռեւս կառուցման փուլում է. աստիճանաբար կթարգմանվեն եւ կտեղադրվեն բոլոր հիմնական էջերը, այնուհետեւ նաեւ լուրերը:
Կայքէջի ֆրանսերեն բաժնի ստեղծումը եւ թարգմանությունն իրականացվում են Ֆրանկոֆոնիայի խորհրդարանական վեհաժողովի «Նորիա» ծրագրի ֆինանսական աջակցությամբ: Նույն ծրագրի ֆինանսավորմամբ Ազգային ժողովում «ՙԱլիանս Ֆրանսեզ»-ը պատգամավորների եւ աշխատակիցների համար իրականացնում է ֆրանսերենի դասընթացներ, որոնց մասնակիցների թիվը հասնում է մոտ 70-ի:
Նշենք, որ ՀՀ Ազգային ժողովը Ֆրանկոֆոնիայի խորհրդարանական վեհաժողովին անդամակցել է 2009թ հուլիսին, Փարիզում կայացած լիագումար նստաշրջանի ընթացքում, որին մասնակցում էր նաեւ ՀՀ ԱԺ նախագահ Հովիկ Աբրահամյանը: Պայմանավորվածություն էր ձեռք բերվել Հայաստանում եւ նրա խորհրդարանում խրախուսել ֆրանսերենի տարածումը, որն այսօր հաջողությամբ իրականացվում է: 2010թ մայիսին ՀՀ Ազգային ժողովի նախա գահի հրավերով Երեւանում տեղի է ունեցել ՖԽՎ Եվրոպայի տարածաշրջանային նիստը, որին մասնակցեցին շուրջ 100 պատվիրակներ:
Ֆրանկոֆոնիայի խորհրդարանական վեհաժողովում ՀՀ ԱԺ պատվիրակության անմիջական աջակցությամբ առաջիկայում կիրականցվեն վիդեոկոնֆերանսներ Երեւանի Վ. Բրյուսովի անվան պետական լեզվաբանական համալսարանի եւ Բելգիայի Լուվենի համալսարանի միջեւ:
