նախընտրելի դարձնելԱՄՆ-ի հարավ-արեւելքում հայտնաբերվել է 4 մարդու մարմին: Նրանց մահը կապում են ձյունամրրիկի հետ, որը մոլեգնում է երկրի այդ հատվածում: Բացի այդ, վատ եղանակի պատճառով հազարավոր չվերթներ չեղարկվել են, գրում է NBC News-ը:
Հաղորդվում է նաեւ, որ վատ եղանակի պատճառով հարյուրավոր տներ եւ ձեռնարկություններ առանց էլեկտրականության են մնացել:
ԱՄՆ-ի Եղանակի ազգային ծառայությունը հաղորդում է, որ ձյունամրրիկը կիրակի ցերեկը սկսել էր մոլեգնել Հյուսիսային Կարոլինա նահանգում, հասել Թենեսի, Արեւմտյան Վիրջինիա եւ Հարավային Կարոլինա:
Ձյունե ծածկույթի առավելագույն բարձրությունը նկատվել է Վիրջինիայում եւ կազմել 18 դյույմ:
Յորք քաղաքում՝ Հարավային եւ Հյուսիսային Կարոլինայի սահմանին երեք երիտասարդ տղամարդկանց մարմիններ են հայտնաբերվել, որոնք ենթադրաբար շմոլ գազից են թունավորվել:
Հյուսիսային Կարոլինայում մրրիկից հետո ճանապարհի վրա ծառ է ընկել, որը սպանել է մեքենայի վարորդին:
Եվս երկու մարդ ծանր վնասվածքներով հիվանդանոց է տեղափոխվել:
