նախընտրելի դարձնել
Իրանը երբեք չի ընդունի երկրի հետ առեւտրի համար INSTEX անունով հայտնի Եվրամիության ֆինանսական մեխանիզմի «նվաստացուցիչ պայմանները», ներառյալ՝ Փողերի լվացման դեմ պայքարի ֆինանսական միջոցառումների մշակման խմբում Իրանի ներգրավումը։ Այս մասին հայտարարել է Իրանի դատական իշխանության ղեկավար այաթոլլա Սադեկ Ամոլի Լարիջանին՝ հայտնում է Tasnim-ը։
Նրա խոսքերով, եվրոպական երկրները INSTEX մեխանիզմի համար երկու «տարօրինակ պայման» են դրել։ Առաջինն այն է, որ Իրանը պետք է միանա Փողերի լվացման դեմ պայքարի ֆինանսական միջոցառումների մշակման խմբին, երկրորդը՝ որ Իրանն իր հրթիռային ծրագրի շուրջ բանակցություններ սկսի։
«Երկրները պետք է իմանան, որ Իրանը ոչ մի դեպքում չի ընդունի այդ նվաստացուցիչ պայմանները»,- ասել է նա։
Մեծ Բրիտանիան, Ֆրանսիան եւ Գերմանիան անցյալ շաբաթ հրապարակել էին համատեղ հայտարարություն՝ INSTEX-ի ստեղծման մասին, որը թույլ կտա ԵՄ-ի եւ Իրանի միջեւ առեւտրի իրականացումն՝ առանց ուղիղ ֆինանսական գործողությունների։
INSTEX-ը գրանցված է Ֆրանսիայում եւ պետք է կառավարվի գերմանացի բանկիր եւ Commerzbank-ի նախկին մենեջեր Պիեռ Ֆիշերի կողմից։
