Եվրամիությունը մտադիր չէ Իսրայելի մաս համարել Գոլանի բարձունքները, չնայած նախագահ Դոնալդ Թրամփը հայտարարել է, որ միջազգային հանրությունը պետք է ճանաչի Իսրայելի ինքնիշխանությունն այդ տարածքների հանդեպ։ Այս մասին ասել է ԵՄ դիվանագիտական ծառայության ներկայացուցիչ Մայա Կոսյանչիչը, տեղեկացնում է ՏԱՍՍ-ը։

«ԵՄ դիրքորոշումը չի փոխվել։ Եվրամիությունը, միջազգային իրավունքին համապատասխան՝ չի ճանաչում Իսրայելի ինքնիշխանությունը»,- ասել է նա։

Նրա խոսքով՝ Իսրայելն օկուպացրել է այդ տարածքները, ներառյալ Գոլանի բարձունքները, 1967 թվականի ամռանը, դրա համար Եվրամիությունը չի դիտարկում դրանք որպես այդ երկրի մաս։

Ինչպես տեղեկացվել էր ավելի վաղ, Թրամփը նշել է, որ անհրաժեշտ է ճանաչել Իսրայելի ինքնիշխանությունը Գոլանի բարձունքների հանդեպ։ «52 տարի հետո եկել է ժամանակը, որպեսզի ԱՄՆ-ը ճանաչի Իսրայելի ինքնիշխանությունը Գոլանի բարձունքների հանդեպ, ինչը չափազանց կարեւոր ռազմավարական նշանակություն ունի Իսրայելի պետության անվտանգության եւ տարածաշրջանային կայունության համար»,- գրել է նա Թվիթերում։

Թրամփի հայտարարությունը հաջորդել է ԱՄՆ պետքարտուղար Մայք Պոմպեոյի Իսրայել կատարած այցին։ Պոմպեոյի հետ հանդիպման ժամանակ երկրի վարչապետ Բենիամին Նեթանյահուն միջազգային հանրությանը կոչ է արել ճանաչել Իսրայելի ինքնիշխանությունը Գոլանի բարձունքների հանդեպ։ Ակնկալվում է, որ Նեթանյահուն կայցելի Վաշինգտոն հաջորդ շաբաթ, որտեղ երկու հանդիպում կունենա Թրամփի հետ։ Ավելի վաղ AP-ը տեղեկացրել էր, որ ԱՄՆ-ը կարող է պաշտոնապես ճանաչել Իսրայելի ինքնիշխանությունը Գոլանի բարձունքների հանդեպ գալիք շաբաթ։

Գոլանի բարձունքները վիճելի տարածք է Մերձավոր Արեւելքում։ Դրա մեծ մասը ներկայում վերահսկում է Իսրայելը, իսկ արեւելյան հատվածը՝ Սիրիան։ Ինչպես Իսրայելը, այնպես էլ Սիրիան Գոլանի բարձունքներն իրենց տարածքի մաս են համարում։

1944-1967 թվականներին Գոլանի բարձունքները մտնում էին սիրիական Կունեյրա նահանգի կազմի մեջ։ Արեւմտյան մասը (տարածքի երկու երրորդը) Իսրայելը զավթեց 1967 թվականի հունիսին, Վեցօրյա պատերազմի ժամանակ։