նախընտրելի դարձնելԱրցախի Հանրապետության պետական նախարար Գրիգորի Մարտիրոսյանը ապրիլի 30-ին գյուղատնտեսության նախարար Ժիրայր Միրզոյանի, շրջվարչակազմերի ղեկավարների, ինչպես նաեւ պաշտպանության նախարարության եւ արտակարգ իրավիճակների պետական ծառայության ներկայացուցիչների մասնակցությամբ հրավիրել է աշխատանքային խորհրդակցություն՝ քննարկելու գարնանացանի ընթացքում հակահրդեհային եւ հակակարկտային կանխարգելիչ միջոցառումների անվտանգ կազմակերպման հարցերը:
Խորհրդակցությանը զեկուցմամբ հանդես է եկել գյուղատնտեսության նախարար Ժիրայր Միրզոյանը: Վերջինս ներկայացրել է գարնանացանի ընթացքի վերաբերյալ ցուցանիշներ, նշել, որ պահանջված սերմերի տրամադրումը գտնվում է ավարտման փուլում եւ ուշացումներ չեն նախատեսվում: Խոսելով հակահրդեհային եւ հակակարկտային պաշտպանության մասին՝ Ժ. Միրզոյանը մասնավորապես նշել է. «Գործընթացը իրականացվում է երկու եղանակով՝ քիմիական եւ մեխանիկական: ՄԻնչեւ մայիսի 6-ը նախատեսվում է ավարտին հասցնել քիմիական եղանակով պայքարը, իսկ մեխանիկականը՝ կախված եղանակային պայմաններից՝ նախատեսում ենք ավարտել մինչեւ հունիսի սկիզբ»:
Գ. Մարտիրոսյանը լրացուցիչ պարզաբանումներ ստանալաով վարչակազմերի ղեկավարներից նշել է, որ պետք է ամեն ինչ անել, որպեսզի նվազագույնի հասցվի ցանքատարածություններում հրդեհների պատճառով բերքի կորուստը՝ անհրաժեշտության դեպքում ներգրավելով լրացուցիչ միջոցներ: «Այս տարի ունենք գոհացնող նախադրյալներ բոլոր մշակաբույսերից լավ բերք ստանալու համար: Այդ իսկ պատճառով պետք է օգտագործենք հակահրդեհային կանխարգելիչ միջոցառումների իրականացման համար մեր ամբողջ հնարավորությունները՝ վնասները նվազագույնի հասցնելու համար»,- ասել է Գ. Մարտիրոսյանը:
Խորհրդակցությանը արտակարգ իրավիճակների պետական ծառայության տնօրենի տեղակալ Վլադիկ Խաչատրյանը ներկայացրել է կատարված եւ նախատեսվող աշխատանքների մասին մանրամասներ:
Հանդիպման ավարտին պետնախարարը հորդորել է սերմերի եւ պարարտանյութերի տրամադրմանը զուգահեռ տեղերում բացատրական աշխատանքներ տանել դրանց ճիշտ եւ անվտանգ օգտագործման վերաբերյալ:
Խորհրդակցությանը մասնակցել է քաղաքաշինության նախարար Կարեն Շահրամանյանը:
