Նախընտրելի
Կիպրոսի նախագահ Նիկոս Անաստասիադեսը եւ Հունաստանի վարչապետ Ալեքսիս Ցիպրասը Ռումինիայում ընթացող Եվրամիության ոչ պաշտոնական հանդիպման ժամանակ ԵՄ առաջնորդներին տեղեկացրել են Կիպրոսի բացառիկ տնտեսական գոտում Թուրքիայի ապօրինի հորատման աշխատանքների մասին, փոխանցում է Ekathimerini-ն:
Նախօրեին Նիկոս Անաստասիադեսը կղզու բացառիկ տնտեսական գոտում Թուրքիայի գործողությունները համեմատել է «երկրորդ ներխուժման» հետ: «Սա միջազգային իրավունքի ակնհայտ խախտում է կամ, ինչպես կարող եմ նկարագրել, երկրորդ ներխուժում՝ հաշվի առնեկով Կիպրոսի բացառիկ տնտեսական գոտու խախտումը»,- ասել է նա: Նիկոս Անաստասիադեսը նաեւ հայտարարել է, որ Թուրքիայի վերջին գործողությունները անհնար են դարձրել կղզու վերամիավորման շուրջ բանակցությունների վերականգնումը:
Սակայն Անկարան պնդել է Արեւելյան Միջերկրականում իր ծրագրերի իրականացումը շարունակելու մասին:
Հաշվի առնելով այս հարցում ԵՄ առաջնորդների հանդեպ նրա հանդուգն դիրքորոշումը, Աթենքը եւ Նիկոսիան կարծում են, որ Թուրքիայի միակ ուղերձը խոշոր ներդրող երկրների կողմից, ինչպիսին են Գերմանիան եւ Նիդեռլանդները, տնտեսական ճնշումն է:
ԵՄ-ն եւ ԱՄՆ-ն արդեն Թուրքիային կոչ են արել խուսափել այնպիսի գործողություններից, որոնք նպաստում են տարածաշրջանում լարվածության մեծացմանը:
ԱՄՆ Պետքարտուղարությունը Թուրքիային կոչ է արել չեղարկել Կիպրոսում հորատման իր ծրագրերը՝ Անկարային մեղադրելով Միջերկրածովյան տարածաշրջանում լարվածության մեծացման վտանգի մեջ:
Կիպրոսի բացառիկ տնտեսական գոտում եւ շելֆում բնական գազի մեծ հանքավայրեր են գտել: 2011 թվականին ամերիկյան Noble Energy ընկերությունը, մասնավորապես, հայտնաբերել էր «Աֆրոդիտե» հանքավայրը, որի պաշարները գնահատվում են շուրջ 140 մլրդ խոր.մետր: Անկարան, որը վիճարկում է Կիպրոսի բացառիկ տնտեսական գոտու սահմանները, շրջան է ուղարկել «Ֆաթիհ» հորատման նավը, որը շաբաթ առավոտից բացառիկ տնտեսական գոտում է: Թուրքիան հայտարարում է, որ հորատումը կտեւի 4 ամիս՝ մինչեւ սեպտեմբերի 3:
