նախընտրելի դարձնել
Առաջատար տեխնոլոգիաների ձեռնարկությունների միության (ԱՏՁՄ) ռազմավարության «Պետությունը՝ որպես պատվիրատու» (e-Gov) ուղղության աշխատանքների շրջանակում ԱՏՁՄ-ն եւ միության անդամ ArmSec հիմնադրամը նախաձեռնել են Bug Bounty: e-Gov հաքաթոն՝ բացահայտելու եւ մշակելու ՀՀ-ում գործող պետական էլ. կառավարման համակարգերի տեղեկատվական անվտանգության խոցելիություններն ու դրանց լուծման հնարավորությունները:
Bug Bounty: e-Gov հաքաթոնն անցկացվել է «Հայ տեք» կիբեռանվտանգության կենտրոնում 6 թիմի (շուրջ 30 մասնագետների) մասնակցությամբ եւ տեւել է 20 ժամ: Պետական համակարգի խոցելիություններ հայտնաբերած լավագույնների եռյակում են NGG, Հայդուկ եւ Bug Hunters թիմերը: Մրցանակային ֆոնդը կազմում է 2000 դոլարին համարժեք դրամ, որը սահմանել են հաքաթոնի աջակիցներ VXSoft եւ Grant Thornton Armenia ընկերությունները: ԱՏՁՄ անդամ` Grant Thornton Armenia ընկերություն ապահովում է նաեւ պրակտիկայի հնարավորություն:
«Սա թերեւս պետության եւ «սպիտակ գլխարկով» հաքերների համագործակցության` համակարգի տեստավորման ու խնդիրների բացահայտման առաջին նախադեպն է այս ձեւաչափով», - նշել է Սամվել Մարտիրոսյանը:
Ucom ընկերության համահիմնադիր եւ գլխավոր տնօրեն Հայկ Եսայանն իր հերթին նշել է, որ ընկերությունը տեխնիկական աջակցություն է տրամադրում հաքաթոնին․ «Ucom ընկերությունը մեծագույն պատրաստակամությամբ է աջակցել e-Gov հաքաթոնի իրականացմանը, որի գաղափարը դեռ տարիներ առաջ էր ձեւավորվել հայաստանյան ՏՀՏ համայնքում: Այս կարեւոր նախագծում ամբողջական տեխնիկական աջակցությամբ ենք հանդես գալիս` տրամադրելով ամպային լուծումներ, ինտերնետ եւ այլն», - Ucom ընկերության համահիմնադիր եւ գլխավոր տնօրեն Հայկ Եսայանը:
ԱՏՁՄ գործադիր տնօրեն Կարեն Վարդանյանը նշեց, որ հիբրիդային պատերազմի պայմաններում կարեւոր է հաղթել բոլոր ոլորտներում․ «Մենք գտնվում ենք հիբրիդային տիպի պատերազմի պայմաններում եւ կարեւոր է հաղթել մարտի բոլոր դաշտերում՝ այդ թվում տեղեկատվական ազդեցության եւ կիբեռանվտանգության ոլորտներում»:
Bug Bounty: e-Gov հաքաթոնի շրջանակում ԱՏՁՄ-ի` ի դեմս գործադիր տնօրեն Կարեն Վարդանյանի եւ «Հայ տեք» կիբեռանվտանգության կենտրոն հիմնադրամի` ի դեմս տնօրեն Լեւոն Պետրոսյանի միջեւ կնքվել է Հայաստանի կիբեռանվտանգությունն ապահովելու գործընթացներում համագործակցության մասին հուշագիր:
Նշենք, որ Bug Bounty: e-Gov հաքաթոնը անցկացվել է ԱՏՁՄ-ի եւ ArmSec հիմնադրամի կողմից հունիսի 28-ից 29-ը: Հաքաթոնի աջակիցներն են «Հայ տեք» կիբեռանվտանգության կենտրոն հիմնադրամը, Ucom, VXSoft, Grant Thornton Armenia եւ 1Guard ընկերությունները:
