Հյուսիսչեխական օպերայի եւ բալետի թատրոնի խաղացանկում մարտից ընդգրկված է բալետային  նոր ներկայացում` Արամ Խաչատրյանի «Գայանեի»  երաժշտությամբ: Լիբրետոն սակայն ամբողջությամբ չի պահպանվել, ռեժիսոր Վլադիմիր Նեչասն այն ձեւափոխել է:

Ըստ չեխական ռադիոյի` ռեժիսորին բալետը բեմադրելուն մղել են Կովկասում ռազմական հակամարտությունների մասին մտորումները, եւ նա որոշել է ներկայացնել տարբեր ազգության մարդկանց սիրո պատմությունը:

Ռեժիսորը հիշել է «Գայանեի» երկրորդ տարբերակը, որի լիբրետոն  1957թ-ին փոխվել էր եւ համապատասխանեցվել կովկասյան իրողություններին, ինչպես նաեւ  Տոլստոյի եւ Պուշկինի «Կովկասի գերի» նույնանուն ստեղծագործությունները, սակայն բալետի սյուժեն այլ է ստացվել: Այս դեպքում սիրահարների պատմությունը զարգանում է Կովկասում երկու ժողովուրդների թշնամանքի մթնոլորտում:

Ըստ սյուժեի` Գայանեն սիրում է գերուն եւ նրա հետ փախչում է, սակայն նրանց վերադարձնում են գյուղ: Գայանեին դատապարտում են եւ նա մեռնում է հոր ձեռքով:

Չեխ ռեժիսորը իր հետաքրքրությունը բացատրել է Արամ Խաչատրյանի իրական գլուխգործոցի նկատմամբ ակնածանքով: