ԱՄՆ-ն կրկին հայտարարել է Իրանի հետ բանակցություններ սկսելու իր առաջարկի մասին, բայց զգուշացրել է, որ կանի իրենից կախված ամեն ինչ «Իրանի կործանարար վարքագիծը սանձելու» համար, եթե Թեհրանը «շարունակի Մերձավոր Արեւելքն ապակայունացնել», փոխանցում է AP-ն:

ՄԱԿ-ում ԱՄՆ դեսպան Քելլի Կրաֆտը հայտարարել է, որ Թրամփի վարչակազմը նաեւ «մերժում է պատերազմի եզրին Իրանի հավասարակշռման քաղաքականությունը՝ նորմալացնելու համար նրա ապակայունացնող վարքագիծը»:

ՄԱԿ-ում Իրանի դեսպան Մաջիդ Թահթ Ռավանչին ԱՄՆ անվերապահ բանակցությունների մասին առաջարկն անվանել է «ոչ անկեղծ»: ԱՄՆ-ն ցանկանում է երկխոսություն վարել ուժի դիրքերից՝ պահպանելով պատժամիջոցները եւ առավելագույն ճնշումը, «այլ ոչ հավասար պայմաններում», ասել է նա: «Իրանը բանակցություններ չի վարում թրի սպառնալիքի տակ»,- ասել է Ռավանչին: Նա նշել է, որ «Իրանը ոչ մի պարագայում իր անվտանգության հարցում փոխզիջման չի գնա»:

ՄԱԿ ներկայացուցիչ Ռոզմարի Դի Կառլոն Անվտանգության խորհրդին ասել է, որ 2019 թվականի ընթացքում տարածաշրջանում լարվածությունը «կտրուկ աճել» է: «Մենք եղել ենք նավթային լցանավերի վրա հարձակումների, քաղաքացիական օդանավակայանի վրա հարվածների եւ Սաուդյան Արաբիայի նավթային օբյեկտների վրա անչափ բարդ ու համաժամանակյա հարձակումների վկաները,- ասել է նա: - Սուր հռետորաբանության համադրությամբ այս իրադարձությունները տարածաշրջանը մոտեցրել են լուրջ առճակատման»:

Բրիտանացի դեսպան Կարեն Փիրսը շեշտել է եվրոպացիների կողմից Իրանի հետ միջուկային համաձայնագիրը պահպանելու կարեւորությունը, որը նա անվանել է «տարածաշրջանային եւ միջազգային խաղաղության ու անվտանգության համար հիմնարար»: Նա հավելել է, որ նախկինի պես դիվանագիտական ջանքերն անհրաժեշտություն են:

Փիրսը ափսոսանք է հայտնել Իրանի վերջին քայլերի կապակցությամբ՝ կապված իր միջուկային պարտավորությունների կրճատման հետ: «Մենք Իրանին կոչ ենք անում դադարեցնել այդպիսի գործողությունները, որոնք միայն խորացնում են անվստահությունը եւ մեծացնում տարածաշրջանային լարվածությունը»,- ասել է նա:

ՌԴ դեսպան Վասիլի Նեբեզնյան Խորհրդին ասել է, որ «Իրանի մեղավորության մասին վկայող, այսպես կոչված, ապացույցները համոզիչ չեն եւ չեն հաստատվում գլխավոր քարտուղարի զեկույցում»: Նա հավելել է, որ զեկույցը տուժում է ապացույցների քրոնիկական անբավարարությունից: «Մենք չենք կարող թույլ տալ, որ գերակայի քաղաքական ճնշումը, տնտեսական շնչահեղձումը եւ ռազմական շանտաժը,- ասել է նա: - Վերջնանպատակը պետք է լինի անվտանգության իսկապես համընդգրկուն ճարտարապետության ստեղծումը, որն արտացոլում է տարածաշրջանի բոլոր երկրների օրինական շահերը»: