Իրավիճակի լիցքաթափումը հնարավոր է միայն տարածաշրջանից ԱՄՆ հեռանալուց հետո։ Այս մասին ասել է Իրանի պաշտպանության նախարար Ամիր Խաթամին ճապոնացի գործընկերոջ՝ Տարո Կյոնոյի հետ հեռախոսազրույցում, տեղեկացնում է Mehr-ը։

Խաթամին իրանցի բարձրաստիճան զինվորական, գեներալ Ղասեմ Սոլեյմանիի սպանությունը երրորդ երկրի տարածքում անվանել է աննախադեպ հանցագործություն՝ ավելացնելով, որ «համաձայն ՄԱԿ Անվտանգության խորհրդի բանաձեւի՝ ԱՄՆ գործողությունները պետական ահաբեկչության օրինակ են»։

Նա ամերիկացիների ներկայությունը անվանել է տարածաշրջանում լարվածության եւ անկայունության գլխավոր պատճառ։ «Տարածաշրջանում լիցքաթափման եւ անվտանգության ու կայունության ապահովման համար մենք պետք է որքան հնարավոր է շուտ վերջ դնենք ԱՄՆ օկուպացիային եւ միջամտությանը»,- նշել է նա։

Խաթամին նաեւ կոչ է արել անկախ եւ ազատ պետություններին դատապարտել ԱՄՆ կառավարության ահաբեկչական գործողությունը։

Ճապոնիայի պաշտպանության նախարարն, իր կողմից, հայտարարել է, որ իր երկիրը պատրաստ է ջանքեր գործադրել տարածաշրջանում լիցքաթափման, խաղաղության եւ կայունության համար։