նախընտրելի դարձնել
Հայաստանի նախագահ Սերժ Սարգսյանը շնորհավորական ուղերձ է հղել Հայաստանի եզդիական համայնքին` նոր տարվա (Մալաքե Թաուսի) կապակցությամբ: Ուղերձում, մասնավորապես, ասված է.
«Սրտանց շնորհավորում եմ Հայաստանի եզդիական համայնքին նոր տարվա` Մալաքե Թաուսի տոնի կապակցությամբ:
Եզդիները դարեր շարունակ մեզ` հայերիս հետ ապրել են կողք կողքի: Այսօր էլ, կազմելով Հայաստանի ամենաակտիվ համայնքներից մեկը եւ լինելով լիիրավ ու օրինապահ քաղաքացիներ, ձեր ուրույն ավանդն եք բերում մեր երկրի շենացմանն ու զարգացմանը: Մենք մեր հերթին, որպես պետական կառույց, առանձնահատուկ պատասխանատվություն ենք զգում Հայաստանում բնակվող ազգային այն փոքրամասնությունների նկատմամբ, ովքեր չունեն պետական կազմավորումներ: Եվ մենք մեր պարտքն ենք համարում կիսել ձեր հոգսերը:
Հայաստանի եզդիական համայնքի հարգելի՛ ներկայացուցիչներ,
Շնորհավորելով այս գեղեցիկ տոնի առթիվ եւ միանալով ձեր ուրախությանը` մաղթում եմ ձեզ ամենայն բարիք: Թող ձեր օջախներում միշտ հնչեն երգն ու ծիծաղը: Թող եզդիների ազգային ավանդույթները, լեզուն ու մշակույթը միշտ վերելք ապրեն, եւ մենք` Հայաստանի բազմազգ քաղաքացիներս, ուրախանանք ձեր հաջողություններով»:
