Չինաստանի իշխանությունները պետք է նախազգուշացնեին ԱՄՆ-ին կորոնավիրուսի տարածման հետեւանքների մասին 2-3 ամիս առաջ, որպեսզի Ամերիկայի կառավարությունը կարողանար նախապես որոշել համապատասխան քայլերը: Շաբաթ այդ կարծիքն է արտահայտել ԱՄՆ նախագահ Դոնալդ Թրամփը՝ պատասխանելով լրագրողների հարցերին Սպիտակ տանը, հաղորդում է ՏԱՍՍ-ը:

«Ես շատ հարգում եմ այդ երկիրը (Չինաստանը), նրա առաջնորդին, որն իմ ընկերն է: Ես կցանկանայի, որ նրանք հայտնեին մեզ այդ մասին ավելի վաղ: Մենք ոչինչ չգիտեինք մինչեւ կորոնավիրուսի տարածումը»,-նշել է երկրի ղեկավարը:

«Հրաշալի կլիներ, եթե մենք ունենայինք եւս 2-3 ամիս… Մենք չենք ունեցել այդ ժամանակը: Չինաստանը շատ փակ երկիր է, ցավոք»,-հավելել է Թրամփը:

Նրա խոսքով՝ Պեկինի կողմից հիվանդության մասին ժամանակին նախազգուշացումը թույլ կտար ամերիկացի բժիշկներին նախապատրաստվել երկրում վարակի տարածմանը: Այնուհետեւ պատասխանելով հարցին, թե ինչու է նա հունվարի 24-ին նշել, որ կորոնավիրուսի մասին չինական կողմի հետ բանակցությունները բաց էին, նախագահն ասել է. «Որովհետեւ դա ճիշտ է այդ պահին բանակցությունները բաց էին»,-պարզաբանել է ԱՄՆ առաջնորդը: