NEWS.am-ը կրճատումներով ներկայացնում է ֆրանսիական հեղինակավոր  «Le Monde» պարբերականում հրապարակված Արա Թորանյանի հոդվածը.

«Ապրլի 13-ին հավաքվելով` Ֆրանսիայի Սենատի իրավական հարցերով հանձնաժողովը միաձայն հայտարարեց Հայոց ցեղասպանության ժխտումը քրեականոցնող  օրենքի անթույլատրելիության մասին: Ինչպես եւ սպասելի էր, այդ հայտարարությունը էյֆորիա առաջացրեց Հայոց ցեղասպանությունը ժխտողների շարքերում:

Նրանք կարծում են, թե արդեն շահել են այդ ճակատամարտը, եւ պատրաստվում են գրոհի գնալ` Հայոց ցեղասպանության ճանաչման մասին 2001թ. ընդունված  օերնքի չեղյալ հայտարարմանը հասնելու համար:

Ժխտողականությունը քրեականացնող օրենքից հրաժարվելը թեւեր է տալու պատմությունը խեղաթյուրողներին, որոնց սադրանքին այլեւս ոչինչ չի խանգարի:

Ենթադրություններ չանենք սենատորների որոշման վերաբերյալ, որը նրանք  պետք է կայացնեն մայիսի  4-ին: Նրանք պետք է ընտրություն կատարեն`  տրվե~լ Թուրքիայի շանտաժին, թե~ գործել հանրապետության ավանդական արժեքներին համապատասխան:

Նիկոլա Սարկոզին 2007 թ. ապրիլի 24-ին մեզ հայտարարել էր. «Ես ամբողջությամբ կիսում եմ ձեր ցանկությունը, որ Ֆրանսիան հանդես գա ժխտողականության  քաղաքականության դեմ,  այն քարոզչության դեմ, որը ձեզ վիրավորում է, ամոթալի քարոզչության դեմ: Հենց խորհրդարանը` ժողովրդի ներկայացուցիչները, պետք է օրենքներ տան երկրին: Դա նրանց գործն է` սահման քաշել ընդունելիի եւ անընդունելիի միջեւ»:

Սոցիալիստական կուսակցությունը ներկայացրել է ցեղասպանության ժխտումը քրեականացնող օրենքը: Մենք մայիսի 4-ին կիմանանք` այս հարցում Հանուն ժողովրդական շարժման միությունն արդյո~ք  համերաշխ է իր բարձրագույն պաշտոնատար անձի հայտարարած պարտավորություններին»: