Վերջին ամիսներին համաշխարհային առաջնորդները բազմիցս ելույթ են ունեցել` խրախուսելով իրենց ժողովրդին կորոնավիրուսի դեմ պայքարի համար, բացառությամբ Նիկարագուայի նախագահ Դանիել Օրտեգայի, որը 40 օրից ավելի չի հայտնվել հանրության առջեւ, հայտնում է CNN- ը:

Վերջին անգամ 74-ամյա նախագահը հայտնվել էր ռազմական միջոցառմանը, որը  հեռարձակվում էր փետրվարի 21-ին: Նա ելույթ էր ունեցել նաեւ մարտի 12-ին Կենտրոնական Ամերիկայի ինտեգրման համակարգի (SIECA) ղեկավարների տեսակոնֆերանսի ընթացքում, որոնք հավաքվել էին համավարակը քննարկելու համար:

Ընդ որում, հեռուստաալիքը նշում է, որ երկրի հասցեին քննադատության ալիք է բարձրացել կորոնավիրուսի տարածման նկատմամբ մոտեցման պատճառով. սահմանները բաց են, դպրոցներն ու համալսարանները նույնպես բաց են, խիստ միջոցներ չեն ձեռնարկվում համաճարակի տարածումը կանխելու համար: Երկրում սոցիալական հեռավորության պահպանման կանոններ չեն կիրառվում, եւ Նիկարագուայի միայն որոշ բնակիչներ են ինքնուրույն որոշել մեկուսանալ` վարակումից խուսափելու համար:

Human Rights Watch կազմակերպությունը Նիկարագուայի առաջնորդի պահվածքը որպես «անգիտակից» է որակել` նշելով, որ նա միակ նախագահն է ամբողջ աշխարհում, ով որեւէ հրապարակային հայտարարություն չի արել կորոնավիրուսի համաճարակի հետ կապված: