Այս միջադեպը չպետք է դիտարկվի որպես առանձին դեպք։ Այն հետևանք է հանրային սպառնալիքների, սեռական բնույթի հայհոյանքների, որոնք օնլայն տիրույթից տեղափոխվել են օֆֆլայն տիրույթ։ Այս մասին այսօր՝ ապրիլի 30–ին, լրագրողներին ասաց «Իմ քայլը» խմբակցության ղեկավար Լիլիթ Մակունցը՝ անդրադառնալով ԱԺ փոխնախագահ Ալեն Սիմոնյանի և «Ադեկվադ» միաբանության ղեկավար Արթուր Դանիելյանի միջև տեղի ունեցած միջադեպին:

«Իրականում փորձ է արվում այնպիսի տպավորություն ստեղծել, որ  դա կարող է տեղի ունենալ ցանկացած քաղաքացու նկատմամբ կամ պաշտոնատար անձի նկատմամբ, ով հնչեցնում է տեսակետ, որը չի համընկնում կոնկրետ խմբի տեսակետին: Իմ կարծիքով՝ հատկապես վերջին օրենքներից մեկը, որը ընդունվեց ապօրինի ձեռք բերված գույքի կապակցությամբ, և դրան հետեւած Ալեն Սիմոնյանի հրապարակային ելույթները, կարծում եմ՝ անմիջականորեն կապված են տեղի ունեցածի հետ»,- ասաց Մակունցը:

Հարցին, թե ո՞վ է անհանգստացած այդ օրենքից, և ում է ակնարկում, Մակունցը պատասխանեց. «Այն բոլոր մարդիկ, ովքեր ապօրինի գույք են ձեռք բերել, եւ Ալեն Սիմոնյանի հայտարարությունները նրանց այդքան էլ դուր չեն եկել, կարծում եմ, որ այս ամենը փոխկապակցված է»:

Ես ասացի՝ բարեւ, Արթուր, որին ի պատասխան լսեցի հայհոյանք, գլխով հարվածեցի իր քթին. Ալեն Սիմոնյան