Նախընտրելի
Հոկտեմբերին Երեւանում կկայանա Ֆրանսախոս քաղաքապետերի միջազգային կազմակերպության 31-րդ Գլխավոր ասամբլեան:
Այսօր` մայիսի 2-ին այս ասամբլեայի նախապատրաստական եւ կազմակերպչական աշխատանքների հետ կապված հարցեր են քննարկվել Երեւանի քաղաքապետ Կարեն Կարապետյանի եւ Ֆրանսախոս քաղաքապետերի միջազգային կազմակերպության մշտական քարտուղար Պիեռ Բայեի հանդիպման ժամանակ:
Մայրաքաղաք Երեւանը Ֆրանսախոս քաղաքապետերի միջազգային կազմակերպության անդամ է 1998թ.-ից:
Կողմերը համոզմունք են հայտնել, որ Գլխավոր ասամբլեայի անցկացումը Երեւանի եւ ֆրանսիական քաղաքների միջեւ գործնական նոր հարաբերությունների հաստատման հիմք կհանդիսանա:
Կարեն Կարապետյանը կարեւորել է Ֆրանսախոս քաղաքապետերի միջազգային կազմակերպության հետ բազմակողմանի ծրագրերի իրականացումը կրթության ու մշակույթի ոլորտներում եւ հույս հայտնել, որ համագործակցությունը զարգացման հեռանկարներ ունի:
Մինչ Երեւանի քաղաքապետի հետ հանդիպումը, Պիեռ Բայեն այցելել էր Երեւանի թիվ 48 եւ 78 դպրոցներ ծանոթանալու կազմակերպության միջոցներով լինգաֆոնային դասարանների ձեւավորման աշխատանքների ընթացքին: Ծրագրի հաջորդ փուլում կազմակերպության ֆինանսավորմամբ նախատեսվում է նաեւ հեռակա ուսուցման համաժամանակյա դասընթացներ անցկացնել ֆրանսերեն երկլեզվյա դասարաններ ունեցող այս դպրոցների միջեւ:
