նախընտրելի դարձնելՔաղաքագիտական տեսանկյունից բացառում եմ, որ մոտ ապագայում կուզենան եւ ցանկություն կունենան նախկին նախագահները մտնել ակտիվ քաղաքականություն, եթե վարչապետ նիկոլ Փաշինյանը նրանց չներբեռնի քաղաքականության մեջ, ինչպես արեց ՀՀ երկրորդ նախագահ Ռոբերտ Քոչարյանի հետ։ Այս մասին այսօր՝ մայիսի 20-ին, լրագրողների հետ զրույցում ասաց «Ադեկվադ» միաբանության ղեկավար Արթուր Դանիելյանը։
«Նիկոլ Փաշինյանի համար էկզիստենցիալ խնդիր է՝ ստեղծել դեմոններ, եւ նրանց ներբեռնել քաղաքականություն։ Եվ այդ դեմոնների հանդեպ հրահրված ատելության ալիքի վրա Նիկոլ Փաշինյանը փորձում է որքան հնարավոր է ձգել։ Մեզ բերման ենթարկելն իրականում սպառնալիք է իրենց համար։ Երեկ միջադեպ է տեղի ունեցել փոխվարչապետ Ավինյանի հետ. Կառավարության շենքից դուրս է եկել, հայհոյվել եւ քիչ էր մնում ծեծի ենթարկվեր, ստիպված փախուստի է դիմել եւ մտել է Կառավարության շենք։ Այս միջադեպերն անընդհատ տեղի են ունենալու եւ ահագնանալու են։ Խոսքերումս չկա սպառնալիք, ես կասեի դա կանխատեսում է»,- ասաց Դանիելյանը։
Արթուր Դանիելյանը նշեց, որ մեր պետությունը կոլապսի մեջ է, այդ թվում՝ իրավապահ համակարգը։
«Փրփուրներից են կախվում, որպեսզի իրենց իշխանությունը մի փոքր էլ կարողանան ձգել, բայց սթափ մտածող մարդկանց համար հասկանալի է, որ հաշված շաբաթներ, եթե ոչ՝ օրեր են մնացել։ Ինչու Լեւոն Տեր-Պետրոսյանը չի հայտարարում, որ 1991 թվականին ուներ 84 տոկոս քվե։ Նույն տրամաբանությամբ էլ աբսուրդային է Փաշինյանի թեզերն այն մասին, թե ժողովուրդն իմ հետ է։ Վստահ եմ, որ եթե ընտրությունները տեղի ունենային այս կիրակի օրը, ապա ժողովրդի մի ստվար զանգված արդեն Փաշինյանի օգտին չէր քվեարկի։ Այսօր բերման ենթարկվածների մեջ կար նաեւ ՔՊ կուսակցության հիմնադիր վարչության անդամ»։
Նշենք, որ այսօր Ոստիկանության «6-րդ վարչության» շենքի մոտից բերման էին ենթարկվել «Ադեկվադ» միաբանության 17 անդամները՝ Ոստիկանության պահանջներին չենթարկվելու համար։
Նշենք, որ «Ադեկվադ» միաբանության անդամ Արթուր Դանիելյանն այսօր հրավիրվել էր Ոստիկանության 6-րդ վարչություն՝ հարցաքննության։
