նախընտրելի դարձնել
«Բարգավաճ Հայաստան» կուսակցության դեմ գործողությունները կատարվում են ելնելով նրանից, որ այն ամենաարդյունավետն եւ հեղինակավորն է բոլոր ընդդիմադիր ուժերից, եւ եթե հաջողվի այն չեզոքացնել, ապա վարչապետ Նիկոլ Փաշինյանի համար ավելի հեշտ կլինի բացարձակ մենիշխանություն հաստատել: Այս մասին NEWS.am-ի թղթակցի հետ զրույցում ասաց քաղտեխնոլոգ Արմեն Բադալյանը:
Նա հիշեցրեց, որ «Բարգավաճ Հայաստան» կուսակցության դեմ գործողությունները սկսվեցին այն բանից հետո, երբ դրա առաջնորդ Գագիկ Ծառուկյանը պահանջեց կառավարության հրաժարականը, եւ այդ գործողությունները պետք է դիտարկել ընդդիմության այլ ուժերի ներկայացուցիչների հետ իր հանդիպումների նույն շղթայում:
«Բնականաբար, չի կարելի հիմք ընդունել այն, որ ինչ-որ քրեական գործ է եղել, որը վաղուց արդեն գտնվում է ուսումնասիրության փուլում, իսկ տեղի ունեցողը պարզապես պատահականություն է: Բացի այդ, մենք տեսնում ենք, որ Հայաստանի ազգային անվտանգության ծառայության նոր ղեկավարն արդեն սկսել է իր ծառայությունները մատուցել վարչապետին, ինչին, ըստ ամենայնի, չէր ուզում գնալ ԱԱԾ նախկին պետը: Եթե նույնիսկ որեւէ մեկը կասկածներ ուներ նման վերադասավորումների հետ կապված, ապա դրանք վերջնականապես հոդս ցնդեցին: Նիկոլ Փաշինյանը հասավ կադրի նշանակմանը, որը կիրականացնի իր համար ցանկալի գործողությունները քաղաքական ընդդիմախոսների դեմ: Չի բացառվում, որ ուժայինների գործողությունները ուղղված են կուսակցություններում վախ տարածելուն:
«Բարգավաճ Հայաստանը», ամենայն հավանականությամբ, հաշվարկել է իր քայլերի բոլոր հետեւանքները, քանի որ այն ոչ միայն քաղաքական ուժ է, այլեւ լուրջ տնտեսական գործոն եւ աշխատատեղեր, որտեղ հարյուրավոր քաղաքացիներ են աշխատում, ովքեր նույնպես կարող են ոչ անտարբեր վերաբեմունք արտահայտել այս իրադարձությունների նկատմամբ»,- նշեց Բադալյանը:
Ըստ քաղտեխնոլոգի՝ Ծառուկյանի ձերբակալության դեպքում հետագա գործընթացները կախված են այլ քաղաքական ուժերի ակտիվությունից: «Եթե նրանք կարողանան հազարավոր քաղաքացիների դուրս բերել փողոց եւ ժողովրդական շարժում կազմակերպել, ապա իշխանությունները կարող են նահանջել, իսկ եթե ոչ, ապա իշխող ուժը կարող է շարունակել ճնշում գործադրել ընդդիմության վրա»,- պարզաբանեց քաղտեխնոլոգը:
«Հնարավոր է, որ այդ գործողությունները կապված են նաեւ իշխանությունների կողմից իրականացվող մաքսանենգության սխեմաների բացահայտման հետ: Գոյություն ունի ընտրազանգված, որը «Իմ քայլը» բլոկը «պողոսներ» է անվանել: Եւ դա որեւէ կերպ չի ազդում նրանց վրա, նրանք շարունակում են սատարել Նիկոլ Փաշինյանին, իսկ ահա բնակչության մնացած մասի վրա դա լուրջ ազդեցություն է ունենում»,- եզրափակեց նա:
