նախընտրելի դարձնել
ԱՄՆ եկեղեցիների ազգային խորհուրդը (NCC) կոչ է անում հայ-ադրբեջանական սահմանին ռազմական գործողությունները դադարեցնել:
«Եկեղեցիների համաշխարհային խորհրդի մեր գործընկերների հետ միասին ԱՄՆ եկեղեցիների ազգային խորհուրդը (NCC) կոչ է անում հայ-ադրբեջանական սահմանին ռազմական գործողությունները դադարեցնել:
Վերջին մի քանի օրերի մարտերը երկու երկրների միջեւ ձգձգված հակամարտության մեջ բռնության վերջին դրվագն են: Ներկայիս բռնությունը հատուկ մտահոգություն է հարուցում, քանի որ տեղի է ունենում կորոնավիրուսի համավարակի դեմ գլոբալ պայքարի ժամանակ, որը, ինչպես հայտարարել է ՄԱԿ գլխավոր քարտուղարը, պետք է դառնա գլոբալ հրադադարի գլխավոր պատճառը, որ միաձայն աջակցություն է ստացել ՄԱԿ Անվտանգության խորհրդի 2532 բանաձեւի ընդունմամբ:
Մինչ այս Հայաստանը հավանություն էր տվել հրադադարի կոչին, Ադրբեջանը դեռեւս դա չի արել:
Չնայած ամեն մի կողմը մյուսին է մեղադրում քաղաքացիական բնակչության վրա հարձակվելու մեջ, կարծես, բռնությունը սրվել է, որի թիրախում են Հայաստանի քաղաքացիական օբյեկտները, ինչի մասին է վկայում հարձակումը անհատական պաշտպանության իրեր արտադրող ֆաբրիկայի վրա: Հայաստանը նաեւ ադրբեջանցի զինվորականներին մեղադրում է քաղաքացիական բնակչությանը որպես վահան օգտագործելու մեջ:
NCC-ն վրդովված է այս գործողություններով: Քաղաքացիական անձանց ուղղված այդպիսի սպառնալիքները հակադրվում են բոլոր սկզբունքներին եւ հակասում ռազմական հակամարտությունների հաստատված ստանդարտներին: Սա ռազմական գործողությունների դադարեցման կոչն ավելի ու ավելի հրատապ է դարձնում:
Մենք աղոթում ենք, որ նրանք, ովքեր այս ժամանակն ընտրել են ռազմական գործողությունների վերսկսման համար, ուշքի գան եւ դադարեցնեն ռազմական գործողությունները: Մենք աղոթում ենք, որ այն ժամանակաշրջանում, երբ ամբողջ աշխարհը պետք է միավորվի Covid-19-ի դեմ պայքարի համար, միջոց գտնվի երկու երկրների միջեւ հակամարտությունն ընդմիշտ կարգավորելու համար»,- նշված է NCC-ի հայտարարության մեջ:
