Ռուսաստանի արտգործնախարար Սերգեյ Լավրովը Ադրբեջանի արտգործնախարար Ջեյհուն Բայրամովի հետ հեռախոսազրույցի ընթացքում հաստատել է Լեռնային Ղարաբաղում տիրող իրավիճակի վերաբերյալ Մոսկվայում Մինսկի խմբի համանախագահների մասնակցությամբ Ադրբեջանի եւ Հայաստանի արտգործնախարարների միջեւ հանդիպում անցկացնելու իր պատրաստակամությունը:

ՌԴ ԱԳՆ փոխանցմամբ՝ Լավրովը լուրջ անհանգստություն է հայտնել շփման գծում շարունակվող ռազմական գործողությունների եւ քաղաքացիական բնակչության շրջանում զոհերի աճի կապակցությամբ:

Ռուսական կողմն ընդգծել է վաղ հրադադարի ռեժիմի անհրաժեշտությունը:

Նշվել է, որ Ռուսաստանը ԵԱՀԿ Մինսկի խմբի մյուս համանախագահների հետ միասին կշարունակի նպաստել բանակցային գործընթացի վերսկսմանը` հիմնված Լեռնային Ղարաբաղի կարգավորման հիմնարար սկզբունքների վրա: Լավրովը հաստատել է Մինսկի խմբի համանախագահների մասնակցությամբ Մոսկվայում Ադրբեջանի եւ Հայաստանի արտգործնախարարների հանդիպում անցկացնելու իր պատրաստակամությունը: