նախընտրելի դարձնել
Հայաստանում համակարգային տնտեսական ճգնաժամն այն քաղաքականության հետեւանքն է, որը վարվել է Հայաստանում բավականին երկար ժամանակ: Այս մասին մարտի 5-ին Երեւան-Մոսկվա տեսակամուրջի ընթացքում հայտարարեց Ռուսաստանի գիտությունների ակադեմիայի տնտեսագիտության ինստիտուտի առաջատար հետազոտող, տնտեսագիտության դոկտոր Ազա Միհրանյանը:
Ըստ նրա` պետական ապարատում եւ կառավարչական կադրերի արդյունավետ համակարգի ձեւավորման խնդիր կա, ինչը լրջորեն խոչընդոտում է տնտեսական զարգացման գործընթացին: Նա նշեց տնտեսական բլոկի պետական կառավարման համակարգի աշխատակազմի ձեւավորման հիմնարար չափորոշիչները եւ մոտեցումները փոխելու կարեւորությունը:
«Եթե մենք խոսում ենք ընդհանուր տնտեսական իրավիճակի մասին, ապա ես առաջին տեղում կդնեի կորոնավիրուսի հետ կապված սահմանափակումների ազդեցությունը, իսկ արդեն երկրորդ տեղում` պատերազմի ազդեցության խնդիրները: Ռազմական գործողությունների ավարտից հետո ծայրաստիճան արդիական է Ադրբեջանի վերահսկողության տակ գտնվող տարածքի եւ Ռուսաստանի խաղաղապահ ուժերի ազդեցության գոտում գտնվող տարածքի միջեւ տնտեսական հարաբերությունների կարգավորման համար իրավական հիմքի ստեղծման հարցը: Տարածքների կորուստը լրջորեն կանդրադառնա Հայաստանում պարենային ապրանքների շուկայի վիճակի վրա: Այս պայմաններում շատ կարեւոր դեր է խաղում Հայաստանի տնտեսական զարգացման ռազմավարությունն ու մոդելի ընտրությունը»,- հավելեց Միհրանյանը:
Փորձագետը շեշտեց տնտեսական մոդելի ձեւավորման անհրաժեշտությունը, որը հիմնված կլինի տնտեսական ներուժի օգտագործման վրա ոչ թե եկամտաբերության ձեւավորման, այլ սոցիալական խնդիրներ լուծման տեսանկյունից: Դա այսօր արդիական է Հայաստանի համար: Ինչ վերաբերում է տրանսպորտային հաղորդակցությունների ապաշրջափակման խնդրին, ապա դա, ըստ տնտեսագետի, բարդ է եւ ուղղակիորեն կախված կլինի էքսպորտային հնարավորություններից, արտահանման ներուժի ձուավորումից, քանի որ ցանկացած տրանսպորտային միջանցքի կառուցում կապված է ոչ միայն քաղաքականության, այլ նաեւ դրա հետ տնտեսական փոխհատուցվելիության հետ:
«Շրջափակման տարիներին Հայաստանի արտահանումը բավականին հստակ կառուցվածք է ձեւավորել, որը հիմնվում է չափազանց մեծ չափի բեռների արտահանման վրա: Այսօր բեռնափոխադրումների առկա կարողությունները (ավտոմոբիլային և, փոքր չափով, ավիացիա) լիովին բավարար են»,- եզրափակեց Միհրանյանը:
