Նախընտրելի
Եվրամիությունը համաձայնել է չինացի պաշտոնյաներին ներառել սեւ ցուցակում մարդու իրավունքների խախտումների համար, հայտնում է Reuters-ը՝ վկայակոչելով երկու դիվանագետներին: 1989-ին զենքի էմբարգոյից ի վեր սա ԵՄ առաջին պատժամիջոցներն են Պեկինի դեմ:
ԵՄ դեսպանները հաստատել են ուղեւորությունների արգելքների եւ ակտիվների սառեցման տեսքով պատժամիջոցները չորս չինացի ֆիզիկական եւ մեկ իրավաբանական անձի նկատմամբ, որոնց անունները չեն հրապարակվի մինչեւ մարտի 22-ին ԵՄ արտգործնախարարների կողմից պաշտոնապես հաստատվելը պատժամիջոցների նոր եւ ավելի լայն ցանկի շրջանակներում:
«Մարդու իրավունքների լուրջ խախտումների դեմ սահմանափակող միջոցներ են ձեռնարկվել»,- ասել է ԵՄ դիվանագետներից մեկը: Չինացի պաշտոնյաները մեղադրվել են Չինաստանում ույղուր մահմեդական փոքրամասնության դեմ մարդու իրավունքների խախտման մեջ, ասել է նա:
ԵՄ-ն վերջին անգամ Չինաստանի՝ իր երկրորդ խոշորագույն առեւտրային գործընկերոջ դեմ պատժամիջոցներ էր կիրառել 1989-ի հունիսին. զենքի արգելքը շարունակվում է մինչ օրս:
