նախընտրելի դարձնել
ՀՀ իշխանությունները պարզապես չեն փորձելու կեղծել առաջիկա արտահերթ խորհրդարանական ընտրությունները: Այս մասին մարտի 24-ին Հայաստանի Ազգային ժողովի նիստին հայտարարեց ՀՀ արդարադատության նախարար Ռուստամ Բադասյանը՝ մեկնաբանելով «Լուսավոր Հայաստան» կուսակցության պատգամավոր Սրբուհի Գրիգորյանի արտահայտած մտավախություններն այս հարցի կապակցությամբ:
Նախարարը, մասնավորապես, հետաքրքրվեց, թե ինչո՞ւ նրանք ընդհանրապես պետք է կեղծեն ընտրությունները:
«Կարծում եմ, որ 2018 թվականից հետո այդ անիվը հետ շրջել հնարավոր չէ, քանի որ քաղաքացիների կամքը որեւէ կերպ խեղաթյուրել հնարավոր չէ: Ընտրական հանցագործությունների արդյունավետ բացահայտման համար համապատասխան օրենսդրական նախաձեռնություններ են մշակվել: Բոլոր մեխանիզմները սահմանված են Ընտրական օրենսգրքով»,- շեշտեց Բադասյանը:
Ի պատասխան՝ Սրբուհի Գրիգորյանն ասաց, որ երկրում կարծիք կա, որ գալիք ընտրությունները կարող են բավականին լարված անցնել եւ որ բռնության դեպքերը չեն բացառվում:
«Ի՞նչ է անելու կառավարությունն այսդ ամենի հետ»,- հարցրեց Գրիգորյանը:
Նախարարը չկիսեց պատգամավորի արտահայտած մտահոգությունները:
«Եթե բռնության դեպքեր լինեն, Հայաստանի ոստիկանությունն ամենայն խստությամբ կքննի այդ բոլոր միջադեպերը»,- հավաստիացրեց Բադասյանը:
