Նորվեգիայի ոստիկանությունը տուգանել է վարչապետ Էռնա Սոլբերգին՝ իր ծննդյան օրվա կապակցությամբ սոցիալական հեռավորության կանոնների խախտման համար: Տուգանքը 20.000 նորվեգական կրոն է (2.352 դոլար) կազմում, այս մասին մամուլի ասուլիսին հայտնել է ոստիկանության պետ Ուլե Սաեւրուդը, փոխանցում է Reuters-ը:

Մարտին վարչապետը ներողություն էր խնդրել լեռնային հանգստավայրում ընտանիքի 13 անդամների հետ իր 60-ամյակը նշելու միջոցառման կազմակերպման համար՝ չնայած կառավարության կողմից 10 հոգուց ավել մարդկանց մասնակցությամբ հավաքների արգելքին:

Չնայած ոստիկանությունը շատ նման դեպքերում տուգանք չէր նշանակի, վարչապետը սահմանափակումներ մտցնելու կառավարության ջանքերի ավանգարդում էր, հայտարարել է ոստիկանությունը: «Չնայած օրենքը բոլորի համար նույնն է, սակայն ոչ բոլորն են հավասար օրենքի առջեւ,- ասել է Սաեւրուդը:- Ուստի ճիշտ է տուգանք նշանակել՝ սոցիալական սահմանափակումների կանոնների նկատմամբ հասարակության վստահությունը պահպանելու համար»,- ասել է նա:

Ոստիկանությունը հայտնել է, որ Սաեւրուդը եւ նրա ամուսինը՝ Սինդրե Ֆինեսը, միասին են որոշում կայացրել կազմակերպել տոնակատարությունը եւ ռեստորան են ընտրել: Չնայած ոստիկանությունը հայտնել էր, որ նա նույնպես խախտել է օրենքը, սակայն չի տուգանվել: Պարզվել է, որ այն ռեստորանը, որտեղ տեղի են ունեցել տոնակատարությունները, նույնպես խախտել է օրենքը, սակայն չի տուգանվել:

Երկրում 2021 թվականի առաջին եռամսյակում դեպքերի արագ աճ էր գրանցվել, ինչը կառավարությանը մարտի վերջին ստիպել էր խստացնել սահմանափակումները: