նախընտրելի դարձնել
ՀՀ կրթության, գիտության, մշակույթի եւ սպորտի նախարարի պաշտոնակատար Վահրամ Դումանյանն ու Լիբանանի Հանրապետության երիտասարդության եւ մարմնակրթության նախարար Վարդինե Օհանյանն այսօր ստորագրել են երկու գերատեսչությունների միջեւ երիտասարդության ու սպորտի ոլորտում համագործակցության մասին մտադրությունների նամակ: ԿԳՄՍ նախարարի պաշտոնակատար Վահրամ Դումանյանի խոսքով՝ այդ փաստաթուղթը նոր խթան է Հայաստանի եւ Լիբանանի միջեւ երիտասարդության ու սպորտի ոլորտում փոխգործակցության զարգացման համար: Այս մասին NEWS.am-ին հայտնում են ՀՀ ԿԳՄՍ նախարարության հասարակայնության հետ կապերի եվ տեղեկատվության վարչությունից։
«Հարգարժա՛ն տիկին նախարար, ողջունում եմ Ձեզ Հայաստանի Հանրապետությունում՝ Ձեր պատմական հայրենիքում: Ուրախ եմ, որ կարողացանք արձանագրել հայ-լիբանանյան հարաբերությունները երիտասարդության եւ սպորտի ոլորտում զարգացնելու մեր մտադրությունը, ինչին, համոզված եմ, շուտով կհաջորդեն գործնական քայլերը: Այսպիսով՝ մենք վերահաստատում ենք Լիբանանի Հանրապետության հետ մեր բարեկամական հարաբերությունները եւ վաղեմի սերտ կապերն առավել ամրապնդելու եւ զարգացնելու պատրաստակամությունը»,- ասել է Վ. Դումանյանը եւ վստահություն հայտնել, որ փաստաթղթի ստորագրումը կնպաստի նաեւ լիբանանահայ համայնքի հետ կապերի ամրապնդմանը:
Վարդինե Օհանյանը շեշտել է, որ հպարտ է որպես Լիբանանի Հանրապետության նախագահ Միշել Աունի հատուկ ներկայացուցիչ Հայաստան այցելելու, Հայոց ցեղասպանության 106-րդ տարելիցի ոգեկոչման միջոցառումներին մասնակցելու եւ ՀՀ ԿԳՄՍ նախարարության հետ մտադրությունների նամակ ստորագրելու կապակցությամբ:
«Շնորհակալ եմ եւ շատ ուրախ այս առիթի համար: Ցանկանում եմ ընդգծել մտադրությունների նամակի ստորագրման կարեւորությունը եւ վստահեցնել, որ երկու պետությունների ու ժողովուրդների պատմական բարեկամությունը երկկողմանի համագործակցությամբ շատ ավելի կամրապնդվի հատկապես երիտասարդության եւ սպորտի ոլորտում: Այժմ Լիբանանի երիտասարդությունը լուրջ մարտահրավերներ եւ դժվարություններ ունի հատկապես աշխատաշուկայում. շատերը, չկարողանալով հայրենի երկրում օգտագործել իրենց ներուժը, արտագաղթում են: Ուստի հույս ունեմ, որ մեր երկրների միջեւ փորձառության փոխանակումը եւ այս փաստաթղթի գործնական կիրառումը երիտասարդներին կօգնեն հաղթահարել նաեւ այդ դժվարությունները»,- ասել է Վ. Օհանյանը եւ շնորհակալություն հայտնել գործընկերային հարաբերությունների համար:
ԿԳՄՍ նախարարի պաշտոնակատար Վահրամ Դումանյանը եւ Լիբանանի Հանրապետության երիտասարդության եւ մարմնակրթության նախարար Վարդինե Օհանյանը վստահեցրել են, որ մտադրությունների նամակի ստորագրման արդյունքները երկար սպասեցնել չեն տա:
Մտադրությունների նամակի ստորագրմամբ նախարարներն արտահայտում են երիտասարդության եւ սպորտի ոլորտում առկա համագործակցությունն ընդլայնելու իրենց մտադրությունը՝ հիմք ընդունելով փոխադարձության, փոխըմբռնման եւ փոխշահավետության սկզբունքները: Մտադրության նամակի իրագործման հետագա պայմանավորվածությունները լրացուցիչ կքննարկվեն կողմերի միջեւ:
