ՆախընտրելիԱրցախը չբնակեցնելը Հայաստանի իշխանությունների ամենամեծ բացթողումն է: Այս մասին լրագրողների հետ հանդիպման ժամանակ հայտարարեց քաղաքագետ Երվանդ Բոզոյանը: Նա դրական գնահատեց եւ ողջունեց ՀՀ եւ ԼՂՀ իշխանություններին ուղղված «Ժառանգության» առաջարկը` վերաբնակեցնել ազատագրված տարածքները:
«Մենք խոսում ենք ԼՂ խնդրի կարգավորման վերաբերյալ եւ բանակցային պրոցեսում փորձում ենք դիրքային առավելություն ունենալ, սակայն դրա համար կոնկրետ քայլեր չենք իրականացնում, որոնցից մեկն էլ ազատագրված տարածքների վերաբնակեցնում է: Դա անհասկանալի է:
Իսրայելը 1967 թվականից հսկայական շինարարական աշխատանքեր իրականացրեց արաբներից գրավված տարածքներում, վերբնակեցրեց այդ տարածքները, որպեսզի ապահովի իր անվտանգությունը: Հենց այդ քաղաքականության էլեմենտներից մեկն էլ այն էր, որ Եգիպտոսը գնաց եգիպտա-իսրայելական խնդրի տարանջատմանը պաղեստինյան խնդրից: Այդպես էլ մենք ենք հիմա պահանջում, որ ԼՂ խնդիրը տարանջատվի հայ-թուրքական հարաբերությունների խնդրից»,-նկատեց քաղաքագետը:
Նրա խոսքով` այս ընթացքում մշտապես կարեւորվել է Արցախի բնակեցման խնդիրը, սակայն առարկայորեն չի ներկայացվել, թե ինչ պետք է արվի այդ ուղղությամբ: «Հայաստանում չկա Արցախը բնակեցնելու տնտեսական քաղաքականություն, որը խթան կհանդիսանար, որպեսզի մարդկանց հոսքը լիներ ոչ թե դեպի Ռուսաստան, այլ` ԼՂՀ: Մենք պահանջում ենք Ղարաբաղը, սակայն առանց այդտեղ ապրող մարդկանց: Սակայն այդպիսի բան բնության մեջ չի լինում»,-նկատեց Բոզոյանը:
