նախընտրելի դարձնել
Մարդու իրավունքների եվրոպական դատարանը (ՄԻԵԴ) 5000-ական եվրո է հատկացրել 2016 թվականի հուլիսի 15-ի պետական հեղաշրջման փորձից հետո Թուրքիայում ձերբակալված ավելի քան 400 դատավորների եւ դատախազների։ Այս մասին հաղորդվում է երեքշաբթի ՄԻԵԴ-ի կայքում հրապարակված դատարանի որոշման մեջ, փոխանցում է ՏԱՍՍ-ը։
Նշվում է, որ դատարանը «միաձայն ճանաչել է Մարդու իրավունքների եվրոպական կոնվենցիայի 5-րդ հոդվածի 1-ին կետի խախտումը [«Անձի ազատության եւ անձեռնմխելիության իրավունք»]՝ դիմողների ապօրինի նախնական կալանքի հետ կապված»։ «Պատասխանող պետությունը [Թուրքիան] պարտավոր է յուրաքանչյուր դիմողին վճարել <...> 5 հազարական եվրո»,- ասվում է փաստաթղթում։
Որոշման մեջ նշվում է, որ դիմումատուները 427 հոգի են, ովքեր այն ժամանակ իշխանության տարբեր մակարդակների դատավորներ եւ դատախազներ են եղել։ Հայցվորները կալանավորվել էին որպես «Ֆեթուլլահիստական կազմակերպության» (FETO) ենթադրյալ անդամներ՝ իսլամական քարոզիչ Ֆեթուլլահ Գյուլենի կողմնակիցներ, ում թուրքական իշխանությունները մեղադրում են պուտչի կազմակերպման մեջ։ ՄԻԵԴ-ը պարզաբանում է, որ դիմումատուները պետական հեղաշրջման փորձից անմիջապես հետո հեռացվել են զբաղեցրած պաշտոններից, իսկ ավելի ուշ՝ կալանավորվել։
2016 թվականի հուլիսի 15-ին Թուրքիայի ԶՈւ մի խումբ զինվորականներ եւ սպաներ պետական հեղաշրջման փորձ կատարեցին եւ ձերբակալեցին նախագահ Թայիփ Էրդողանին։ Հիմնական դիմակայությունը ծավալվեց Ստամբուլում եւ Անկարայում, 250 մարդ զոհվեց՝ չհաշված պուտչիստներին, ավելի քան 2 հազար մարդ վիրավորվեց։ Անկարան FETO-ին մեղադրում է պուտչի կազմակերպման մեջ: Թուրքիայում այս կազմակերպությանն աջակցության վերաբերյալ գործերի մասով հազարավոր մարդիկ են դատապարտվել:
