նախընտրելի դարձնելՄԱԿ-ի արդյունաբերության զարգացման կազմակերպության (UNIDO)` Հայաստանի հետ համագործակցության արդյունքում Հայաստանի արտադրողները հնարավորություն կունենան դառնալ եվրոպական մեծածախ առեւտրի ցանցի մատակարարներից մեկը` խթանելով արտահանման ծավալները: Այս մասին այսօր` հուլիսի 12-ին, Հայաստանի փոխվարչապետ, տարածքային կառավարման նախարար Արմեն Գեւորգյանի հետ հանդիպման ժամանակ ասել է ՄԱԿ-ի արդյունաբերության զարգացման կազմակերպության (UNIDO) կենտրոնակայանի գործարար կապերի եւ կլաստերների ծրագրերի ղեկավար Ջերարդո Պատակոնիին:
NEWS.am-ին ՏԿՆ մամուլի ծառայությունից հայտնեցին, որ հանդիպման ընթացքում փոխվարչապետին ներկայացվել են UNIDO-ի եւ Հայաստանի համագործակցության ընդլայնմանը վերաբերող հարցեր: Մասնավորապես` քննարկվել են Հայաստանի արտադրողների եւ UNIDO-ի գործընկեր եվրոպական մեծածախ առեւտրի ցանց հանդիսացող «METRO» կազմակերպության հետ համագործակցության հնարավորությունները:
Նշենք, որ Հայաստանում UNIDO-ն իրականացնում է «ԵվրԱզԷՍ-ի երկրների միջեւ արդյունաբերական կապերի ինտեգրացիա» ծրագիրը: Կազմակերպության հիմնական առաքելությունն է հզորացնել երկրների ազգային կարողությունները` տնտեսության մրցունակության բարձրացման, առեւտրի, ներդրումների, արտահանումների ծավալների աճին նպաստելու ճանապարհով:
Փոխվարչապետը կարեւորել է կազմակերպության մտադրությունը` հայկական գործարար միջավայրի համար սպառման նոր շուկաների ստեղծման հնարավորության առումով` հատկապես ընդգծելով գյուղատնտեսական արտադրանքի արտահանման համար բարենպաստ միջավայրի ստեղծումը: Ա. Գեւորգյանը նշել է, որ արտադրողների շրջանում պետք է բարձրացնել այս գործընթացների մասին իրազեկվածության մակարդակը` միեւնույն ժամանակ առաջարկելով ուսումնասիրել հայկական շուկան` համապատասխան որակի եւ քանակի արտադրանքի ապահովման տեսանկյունից: Հանդիպման ընթացքում հյուրերը ՀՀ փոխվարչապետին փոխանցել են UNIDO-ի գլխավոր տնօրեն Կ. Յումկելայի նամակը, որում Հայաստան այցելելու հրավերն ընդունելով` պատրաստակամություն է հայտնվում քննարկել Հայաստանի հետ համագործակցության ընդլայնման հնարավորությունները:
