Բաքուն, հնարավոր է, ակնկալում է մեծացնել իր փոքր ՌՕՈՒ-ի ինքնաթիռների թիվը՝ Թուրքիայում եւ Վրաստանում ձեռքբերումների հաշվին, Forbes ամսագրում գրել է վերլուծաբան Փոլ Իդդոնը:

Վերլուծաբանի խոսքով՝ Ադրբեջանը, որի ներկայիս ռազմաօդային ուժերը բաղկացած են ռուսական արտադրության մեկ տասնյակ «ՄիԳ-29» կործանիչներից եւ մեկ տասնյակ «Սու-25» գրոհային ինքնաթիռներից, հնարավոր է, հուսով է ձեռք բերել ուսումնամարզական ինքնաթիռներ, մասնավորապես՝ թուրքական երկտեղանի խողովակապտուտակային TAI Hürkus ուսումնամարզական ինքնաթիռներ, որոնք կարելի է օգտագործել նաեւ որպես թեթեւ գրոհայիններ:

«Ադրբեջանը կարող է նաեւ հետաքրքրված լինել Hürjet-ով, երբ այն դուրս գա հավաքման գծից՝ ուժեղացնի իր ավիացիան, պատրաստի նոր օդաչուներ եւ գործող օդաչուներին թռիչքի լրացուցիչ ժամանակ տա»,- գրել է Իդդոնը՝ հավելելով, որ Բաքուն կարող է նաեւ այլ տարբերակ դիտարկել՝ թուրքական մարտական/ուսումնավարժական TAI Hürjet ինքնաթիռը։

Ինչպես հայտնում է Defense News-ը, նոյեմբերին Նիգերը դարձավ առաջին երկիրը, որը գնեց Turkish Aerospace Industries-ի (TAI) Hürkuş ուսումնամարզական ինքնաթիռը։ Ինքնաթիռը, որը կարող է 3300 ֆունտ զենք կրել եւ թռիչք կատարել անպատրաստ թռիչքուղիներից, նախատեսված է օդաչուների պատրաստման եւ հետախուզական կամ նույնիսկ թեթեւ գրոհային առաջադրանքների համար:

«Թուրքիան օգնել է Բաքվին արդիականացնել իր գրոհային ինքնաթիռները, որպեսզի դրանք համատեղելի դարձնի թուրքական եւ տեղական սպառազինությունների, այդ թվում՝ թուրքական SOM թեւավոր հրթիռի հետ, որի հեռահարությունը մոտ 150 մղոն է»,- գրել է Իդդոնը: «Ինքնաթիռները հագեցած են նաեւ ռադիոէլեկտրոնային դիմակայության բելառուսական «Թալիսման» բլոկներով, որոնք, ինչպես ենթադրվում է, մեծացրել են դրանց կենսունակությունը լեռնայինղարաբաղյան վերջին պատերազմում»,- հավելել է նա։

Իդդոնը նշել է, թե Ադրբեջանը կարող է ոգեշնչված լինել Հայաստանից, որը «Ռուսաստանից գնել է չորս գերմանեւրելի «Սու-30ՍՄ» բազմաթիրախային կործանիչներ, որոնք նույնիսկ չեն օգտագործվել 2020 թվականի հակամարտության ժամանակ, չնայած որ ամենաառաջադեմ եւ մարտունակ կործանիչն են եղել Երեւանի զինանոցում»։