ՆԱՏՕ-ն Ռուսաստանին մեղադրել է լրացուցիչ զորքեր ուղարկելու մեջ՝ Ուկրաինայի շուրջ ռազմական հզորությունը մեծացնելու համար, թեեւ Մոսկվան հայտարարել է, որ դուրս է բերում զորքերը եւ բաց է դիվանագիտության համար, հաղորդում Է Reuters-ը:

ՆԱՏՕ-ի երկրների պաշտպանության նախարարների միջեւ  երկօրյա բանակցությունների սկզբում ՆԱՏՕ-ի գլխավոր քարտուղար Յենս Սթոլթենբերգը հայտարարել է. «Մենք ռուսական զորքերի ոչ մի դուրսբերում չենք տեսել։ Եվ, իհարկե, դա հակասում է դիվանագիտական ջանքերի հղմանը։ Մենք տեսնում ենք, որ նրանք ավելացրել են զորքերի քանակը, եւ ավելի շատ զորքեր են գտնվում ճանապարհին։ Այնպես որ, առայժմ ոչ մի դեէսկալացիա»։

Սթոլթենբերգը նախազգուշացրել է, որ ռուսները հաճախ են զինտեխնիկան եւ զորքերը վերատեղադրել ավելացման ժամանակ: «Ուժերի, մարտական տանկերի տեղաշարժը չի հաստատում հեռանալու փաստը», - ասել է նա:

ՆԱՏՕ-ն կքննարկի իր արեւելյան թեւում Ռուսաստանին զսպելու ուղղությամբ նոր քայլերը։

Բացի այդ, դաշնակիցները, հավանաբար, լրացուցիչ զորքեր եւ տեխնիկա կտրամադրեն Արեւելյան Եվրոպայում ՆԱՏՕ-ի անդամներին: Դիվանագետները հայտարարել են, որ Ռումինիայում, Բուլղարիայում, Հունգարիայում եւ Սլովակիայում կարող են ներգրավվել 4000 նոր զինծառայողներ: Նախարարները նաեւ կքննարկեն զսպման միջուկային միջոցները, թեեւ քննարկումները խիստ գաղտնի բնույթ են կրում։

«Ուկրաինայի հետ սահմանին ռուսական զորքերի էսկալացիան աճում է, եւ դա մեզ կոչ է անում որպես դաշինք շարունակել համատեղ աշխատանքը», - հայտարարել է Կանադայի պաշտպանության նախարար Անիտա Անանդը՝ ժամանելով հանդիպմանը։