նախընտրելի դարձնել
ՌԴ ԱԳ նախարար Սերգեյ Լավրովն Անթալիայում կհանդիպի Թուրքիայի արտգործնախարար Մեւլութ Չավուշօղլուի հետ, ինչպես նաեւ կմասնակցի Սիրիայի հարցով Աստանայի գործընթացի երաշխավոր երկրների (Ռուսաստան, Իրան, Թուրքիա) եռակողմ հանդիպմանը։ Այս մասին երկուշաբթի հայտարարել է ՌԴ նախագահի՝ Մերձավոր Արեւելքի եւ Աֆրիկայի հարցերով հատուկ ներկայացուցիչ, փոխարտգործնախարար Միխայիլ Բոգդանովը՝ «Վալդայ»միջազգային քննարկման ակումբի XI Մերձարեւելյան համաժողովի բացմանը, փոխանցում է ՏԱՍՍ-ը։
«Անթալիայում տեղի կունենա մեր նախարարի երկկողմ հանդիպումը եւ Աստանայի գործընթացի երաշխավոր երկրների արտգործնախարարների եռակողմ հանդիպումը»,- ասել է նա։
Բոգդանովը նշել է, որ Ռուսաստանն ու Թուրքիան նաեւ ռազմական երկխոսություն են վարում։ «Խմեյմիմ բազայում մեր ղեկավարությունը շատ առաջադեմ եւ արդյունավետ շփումներ ունի թուրք զինվորականների հետ»,- հավելել է փոխնախարարը։
Ավելի վաղ Թուրքիայի ԱԳՆ-ի աղբյուրը հայտնել էր, որ Լավրովն իր թուրք գործընկեր Մեւլութ Չավուշօղլուի հետ հեռախոսազրույցում հաստատել է իր մասնակցությունը մարտի 11-13-ը Անթալիայում նախատեսված դիվանագիտական ֆորումին, ինչպես նաեւ՝ Սիրիայի հարցով կայանալիք հանդիպմանն Աստանայի ձեւաչափով։
Չավուշօղլուն իր հերթին ավելի վաղ հայտնել էր, որ Սիրիայի հարցով Աստանայի ձեւաչափով հանդիպումը նախատեսված է Անթալիայում դիվանագիտական ֆորումից մեկ օր առաջ ։ Սիրիայի հարցով նախորդ միջազգային հանդիպումը կայացել էր 2021 թվականի դեկտեմբերի 21-22-ը Նուր-Սուլթանում՝ երաշխավոր երկրների հատուկ ներկայացուցիչների մակարդակով։
