նախընտրելի դարձնել
Ադրբեջանի եւ Վրաստանի կրթության նախարարներ Էմին Ամրուլաեւը եւ Միխայիլ Չխենկելին այսօր Թբիլիսիում կրթության ոլորտում երկկողմ համագործակցության մասին համաձայնագիր են ստորագրել, ասվում է Վրաստանի կրթության նախարարության ֆեյսբուքյան էջին, գրում է «Նովոստի-Գրուզիան»։
«Համաձայնագիրը համագործակցություն է նախատեսում հանրակրթության, մասնագիտական կրթության եւ բարձրագույն կրթության ոլորտներում։ Համաձայնագրի շրջանակներում կամրապնդվեն կապերն ակադեմիական, բարձրագույն ուսումնական հաստատությունների եւ մասնագիտական ուսումնական հաստատությունների միջեւ:
Համաձայնագիրը նաեւ բակալավրիատի մակարդակում վրացերեն եւ ադրբեջաներեն լեզուների ուսումնասիրություն է նախատեսում համապատասխան բուհերում:
Հանդիպմանը նախարարները դրական են գնահատել երկու երկրների համագործակցությունը, որը Վրաստանում ադրբեջանալեզու դպրոցները, իսկ Ադրբեջանում՝ վրացալեզու դպրոցները դասագրքերով ապահովում է ենթադրում:
Դրական է գնահատվել նաեւ Վրաստանի Քննությունների եւ գնահատականների ազգային կենտրոնի եւ Ադրբեջանի պետական քննական կենտրոնի համագործակցությունը, որի շրջանակներում ադրբեջաներեն լեզվի եւ գրականության ուսուցիչների համար քննության առաջադրանքներ են մշակվել:
Էմին Ամրուլաեւը շնորհակալություն է հայտնել Վրաստանի կառավարությանը եւ անձամբ Միխայիլ Չխենկելիին՝ Վրաստանում ապրող ադրբեջանցիներին պետական լեզուն սովորելու հարցում աջակցության համար։ Նա ընդգծել է, որ դա իրենց հնարավորություն է տալիս սովորել Վրաստանի բուհերում եւ ինտեգրվել հասարակությանը»,- ասվում է հաղորդագրության մեջ:
