նախընտրելի դարձնելՆոր նախագահի (Վահագն Խաչատրյան-խմբ.) հետ աշխատելու հնարավորություն չեմ տեսնում, բայց ամեն ինչ կախված է նրանից։ Այս մասին մարտի 3-ին լրագրողների հետ զրույցում ասաց «Հայաստան» խմբակցության պատգամավոր Վահե Հակոբյանը։ Նրա խոսքով՝ Խաչատրյանն ավելի շուտ կարող էր լինել հանձնաժողովի նախագահի, այլ ոչ թե ՀՀ նախագահի թեկնածու։
Հակոբյանը նշեց, որ երեկ տեղի ունեցավ Փաշինյանի կողմից հերթական մանիպուլյացիան, ով ասաց, որ «գլուխները կախ եկան եւ վճարեցին»։ «Ինչո՞ւ ՊԵԿ-ը կոնկրետ տվյալներ չի հրապարակել։ Ի՞նչ թալանի մասին է խոսքը։ ՊԵԿ-ը միտումնավոր անուններ չի հրապարակել, որպեսզի Փաշինյանին հնարավորություն տա հերթական պոպուլիստական հայտարարությունն անել։ Եթե իմ մասին էր խոսքը, ապա մեր հարաբերությունները կպարզենք դատարանում»,- հավելեց Հակոբյանը։
Նա վստահեցրեց, որ օգոստոսի 2-ից ինքը կապ չունի այդ հիմնարկի (Զանգեզուրի պղնձամոլիբդենային կոմբինատ-խմբ.) հետ եւ երբեք փայամաս չի ունեցել այնտեղ։
«Ինչ վերաբերում է Սյունիքին, այո, ես ասել եմ եւ ասում եմ, որ Սյունիքի մասին կխոսեմ, առաջիկայում պատրաստվում եմ օրինագիծ նախաձեռնել»,- ասաց պատգամավորը։
Հակոբյանը համաձայն չէ, որ ընդդիմությունը ոչինչ չի անում. «Մենք կատարում ենք պատգամավորի գործառույթներ։ Այս կամ այն գործընթացին կամ դրա բոյկոտին մասնակցության մասին որոշումը կայացնում է խմբակցությունը։Մենք մեր գործունեությունը նորմալ ենք համարում։ Մենք մշտական կապի մեջ ենք ընտրողների հետ եւ պատրաստ ենք լսել մեր թերությունների ու բացթողումների մասին, շատ ակտիվ աշխատում ենք միջազգային կառույցների հետ, եւ մեզ հաջողվում է հասնել որոշակի արդյունքի»,- եզրափակեց նա։
