նախընտրելի դարձնել
ՌԴ նախագահ Վլադիմիր Պուտինը Հնդկաստանի վարչապետ Նարենդրա Մոդիի հետ հեռախոսազրույցում պատմել է, որ ռուս զինվորականներն ամեն ինչ անում են Հնդկաստանի քաղաքացիներին Ուկրաինայի Սումի քաղաքից տարհանելու համար։ Այս մասին հայտնում է Կրեմլի մամուլի ծառայությունը։
«Խարկովում արմատականների մոտ պահվող հնդիկ ուսանողներին հաջողվել է լքել քաղաքը միայն Կիեւի իշխանությունների վրա միջազգային ուժեղ ճնշման արդյունքում։ Ռուս զինծառայողները գործադրում են բոլոր ջանքերը՝ ապահովելու Հնդկաստանի քաղաքացիների տարհանումը Սումի քաղաքից»,- ասվում է հաղորդագրության մեջ։
Նշվում է, որ Մոդին «երախտագիտություն է հայտնել ռուսական կողմին՝ իր հայրենակիցներին հայրենիք վերադարձնելու նպատակով ձեռնարկված միջոցների համար»։
Կրեմլի մամուլի ծառայությունը նշում է, որ Մոդին ասել է, որ պատրաստ է նպաստել Ուկրաինայում իրավիճակի կարգավորմանը։
Պուտինը նշել է, որ ուկրաինացի ազգայնականները շարունակում են կանխել վտանգավոր տարածքներից խաղաղ բնակիչների դուրսբերումը։ «Վլադիմիր Պուտինը տեղեկացրել է Հնդկաստանի վարչապետին, որ հաշվի առնելով հումանիտար իրավիճակի սրումը՝ Ռուսաստանի Զինված ուժերն այսօր հայտարարել են լռության ռեժիմ սահմանելու եւ հումանիտար միջանցքներ բացելու մասին»,- ասվում է հաղորդագրության մեջ։
