նախընտրելի դարձնել
Վերջին շրջանում Ադրբեջանի ուժային կառույցներում եւ պաշտոնական Բաքվի դիրքորոշման մեջ որոշակի նյարդայնություն է նկատվում։ Այս մասին NEWS.am-ի թղթակցի հետ զրույցում ասաց Արցախի արտգործնախարար Դավիթ Բաբայանը։
«Այս նյարդայնությունը որոշ չափով ազդում է Բաքվի քաղաքականության վրա, որն արտահայտվում է ապակառուցողական գործողությունների սրմամբ։ Փաստորեն, Ադրբեջանը հումանիտար տեռոր է իրականացնում Ղարաբաղի դեմ, դա այլ կերպ չի կարելի անվանել։ Ադրբեջանը մի քանի օր է՝ խոչընդոտում է գազատարի վերանորոգմանը։ Հարցն այն է, թե ինչու, որտեղի՞ց է առաջանում նյարդայնությունը։ Բավականին վտանգավոր ժամանակահատվածում, ինչպիսին հիմա է, պետությունը պետք է իրեն ավելի զգույշ պահի։ Բայց մենք հակառակն ենք տեսնում. Այո, Ադրբեջանը երբեք չի թաքցրել իր ատելությունը Հայաստանի, Արցախի եւ Ռուսաստանի նկատմամբ, եւ թեեւ հաճախ անխոհեմություն է դրսեւորել, բայց ընդհանուր առմամբ պահպանել է Ադրբեջանի համար տրամաբանական վարքագիծ։ Հիմա մենք տեսնում ենք որոշակի անհամապատասխանություններ՝ նյարդայնության հետեւանքով։
Փաստացի ստացվում է, որ հիմա Ադրբեջանն ամեն կերպ փորձում է, թեկուզ վիրտուալ հարթությունում, ոչնչացնել Ղարաբաղը՝ ասելով, որ նման կազմավորում չկա։ Հիշեցնեմ, որ Ալիեւը ստորագրել է 2020թ․ նոյեմբերի 9-ի հայտարարությունը, որում մի քանի անգամ նշվում է Լեռնային Ղարաբաղը։ Ի՞նչ է ստացվում, ԱԳՆ-ն, ՊՆ-ն, նախագահական ապարատը մերժո՞ւմ են այս փաստաթուղթը, մարտահրավե՞ր են նետում Ալիեւին։ Թե՞ Ալիեւն ինքն իրեն հակասում է։ Սա բավականին տարօրինակ է։ Իսկ եթե նման միավոր չկա, ուրեմն հայտարարությունն անվավե՞ր է։ Եթե անվավեր է, ուրեմն այստեղ անվավեր է նաեւ ռուսական խաղաղապահ զորախումբը։ Բայց մյուս կողմից էլ նյարդայնության պատճառն այն է, որ Բաքվի այս դիրքորոշումը չի ընկալվում միջազգային հանրության կողմից։ Ավելին, նրանք ամեն կերպ փորձում են խաղալ Ռուսաստանի եւ Արեւմուտքի հակասությունների վրա, առայժմ՝ անհաջող։ Ռուսաստանի ղեկավարության հայտարարությունները բազմիցս սառը ցնցուղ են դարձել Ադրբեջանի իշխանությունների համար։ Բաքվի փորձերին ի պատասխան՝ ռուսական կողմը բազմիցս հայտարարել է, որ հակամարտությունը չի լուծվել։ Ադրբեջանը փորձեց բարձրացնել Լաչինի միջանցքը փակելու, անցակետեր ստեղծելու հարցը, ինչին Մոսկվան պատասխանեց, որ Լաչինի միջանցքը վերահսկում են ռուս խաղաղապահները»,- նշեց Դավիթ Բաբայանը։
Արցախի ԱԳՆ ղեկավարը հիշեցրեց, որ արդեն ավելի քան մեկ շաբաթ է՝ Եվրախորհրդարանը քննարկում է երեկ ընդունված բանաձեւը, որը դատապարտում է Ադրբեջանի կողմից Ղարաբաղի օկուպացված տարածքներում իրականացված մշակութային ցեղասպանությունը։ «Սա եւս մեկ հարված է Բաքվի դիրքորոշմանը, նրան, որ Ադրբեջանը մշակութային ցեղասպանություն է իրականացնում։ Փաստացի ճանաչվում է տարածքների օկուպացումը, եւ դա նյարդայնություն է առաջացնում։ Ավելին, Բաքվում մեծ հույսեր ունեին, որ շուտով կսկսվի Ռուսաստանի կազմաքանդումը։ Բաքվի զանգվածային ցույցը, անկասկած, կազմակերպվել էր իշխանությունների կողմից։ Եթե Բաքվում մի քանի հոգի հավաքվեն, թեկուզ զբոսնելու համար, էլ չեմ ասում հանրահավաքների ու բողոքի ակցիաների, համաշխարհային հանրության աչքի առաջ նրանց կարող են ծեծել, բանտարկել։ Ի՞նչ է՝ Ալիեւը չի՞ վախենում գունավոր հեղափոխություններից։ Իհարկե, վախենում է: Ինչո՞ւ են հավաքվել, որովհետեւ բոլորը մանրակրկիտ ստուգվել են։ Ավելին, պետական կառույցների աշխատակիցները շատ էին։ Նրանք կարծում էին, որ կսկսվի Ռուսաստանի կազմաքանդումը։ Բաքվի հաշվարկները հեռու են իրականությունից՝ չնայած դեռ հույսեր փայփայում են։ Թուրքիան զինյալների է տեղափոխում Ադրբեջանի տարածքով, զենք, ըստ որոշ տեղեկություններով՝ «Բայրաքթարներ» է տեղափոխում Ուկրաինա։ Սա ակնհայտ անբարյացակամ քայլ է Ռուսաստանի նկատմամբ, թիկունքից հարված։ Արցախում սադրանքներն ուղղված են ոչ միայն մեր, այլ ռուսական խաղաղապահ առաքելության դեմ, սա հասկանում են բոլորը։ Նյարդայնության մյուս պատճառը դաշնակցային հարաբերությունների մասին վերջերս ստորագրված պայմանագիրն է։ Դա խիստ բացասական արձագանք է առաջացրել Ադրբեջանում։ Պայմանագիրը կնքելով՝ հիմա իրենք են խախտում այն։ Բայց, ինչպես ասացվածքն է ասում, խորամանկ աղվեսը երկու ոտքով թակարդը կընկնի։ Այս մարտավարությունը, երբ Ադրբեջանի ղեկավարությունը հավատարմության երդում է տալիս Ռուսաստանին, բայց գաղտնի կերպով հովանավորում է հակառուսական շարժումներին, չի կարող հավերժ լինել, եւ Բաքուն նյարդայնանում է։ Բաքվի համար փրկօղակը կլիներ Ռուսաստանի կազմաքանդումը, միայն դա Ադրբեջանին հնարավորություն կտար հասնել էքսպանսիոնիստական նպատակներին։ Սակայն դրա պատանդն առաջին հերթին Ադրբեջանի ժողովուրդն է»,- եզրափակեց Բաբայանը։
