ԵՄ երկրները ԵՄ ինստիտուտներում կիբեռանվտանգության ռիսկերը կառավարելու համար կառույց պետք է ստեղծեն, քանի որ կիբեռգրոհների թիվը մտահոգության տեղիք է տալիս, դրանք կարող են խափանել հիմնական ծառայությունների աշխատանքը եւ գաղտնի տեղեկատվություն գողանալ: Այս մասին հայտարարել է Եվրահանձնաժողովը։

Առաջարկությունը Եվրահանձնաժողովի կանոնների նախագծերի «Կիբեռանվտանգության կանոնակարգ» կոչվող փաթեթի մի մասն է, որը նաեւ ուղղված է Կիբեռանվտանգության խորհրդի ստեղծմանը՝ նոր կանոնների կատարումը վերահսկելու համար, հաղորդում է Reuters-ը:

«Կիբեռանվտանգության մեկ միջադեպը կարող է ազդել մի ամբողջ կազմակերպության վրա: Այդ իսկ պատճառով շատ կարեւոր է ուժեղ պաշտպանություն ստեղծել կիբեռսպառնալիքներից եւ միջադեպերից, որոնք կարող են խախտել մեր գործելու ունակությունը»,- ասվում է բյուջեի հարցերով եվրահանձնակատար Յոհաննես Հանի հայտարարության մեջ:

Կանոնների նախագծի համաձայն՝ ԵՄ բոլոր ինստիտուտները, մարմինները եւ գործակալությունները պետք է բացահայտեն կիբեռանվտանգության ռիսկերը, իրենց կիբեռանվտանգությունը բարելավելու ծրագիր մշակեն, կանոնավոր գնահատումներ կատարեն եւ փոխանակեն միջադեպերի վերաբերյալ մանրամասները։

Եվրոպական հանձնաժողովը նաեւ առաջարկել է տեղեկատվական անվտանգության կանոնակարգ, որը ԵՄ բոլոր կառույցների համար նվազագույն կանոններ եւ չափորոշիչներ կստեղծի:

Ավելի վաղ ԵՄ նախարարները կոչ էին արել կիբեռանվտանգության արտակարգ իրավիճակների արձագանքման հիմնադրամ ստեղծել՝ լայնածավալ կիբեռհարձակումներին հակազդելու համար։