Մենք շարունակելու ենք բոյկոտը խորհրդարանական ոչ մի նիստի չենք մասնակցելու: Այս մասին այսօր՝ ապրիլի 20-ին, Ազատության հրապարակում լրագրողներին հայտնեց ԱԺ «Պատիվ ունեմ» խմբակցության պատգամավոր Թագուհի Թովմասյանը։

«Շարունակելու ենք մեր գործողություններն Ազատության հրապարակում: Օրենսդիր աշխատանքի ժմանակավորապես դադար ենք վերցնում»,-ասաց նա:

Դիտարկմանը, որ այդ դեպքում խորհրդարանում իշխանություններին, այդ թվում վարչապետին հակադարձող էլ չի լինի, Թագուհի Թովմասյանն ասաց. «Մենք կհակադարձենք Ազատության հրապարակից, եւ եթե անհրաժեշտություն առաջանա, ցանկացած ժամանակ կարող ենք վերադառնալ խորհրդարան: Մենք ԱԺ պատգամավորի մանդատները վայր չենք դնում այդ նպատակով, ինչպես նաեւ այն նպառակով, որ հնարավոր իշխանափոխությունը անպայման լինելու է խորհրդարանի միջոցով եւ անհրաժեշտ են լինելու պատգամավորներ:

Պատգմավորական մանդատները վայր դնելով Ազգային ժողովը չի լուծարվում: Եթե այդպես լիներ, մենք այդ քայլը վաղուց արել էինք»:

Ինչ վերաբերում է նրան, որ Ազատության հրապարակում հիմնականում «Պատիվ ունեմ» խմբակցությունն է, ընդդիմադիր պատգամավորը վստահեցրեց, որ իրենց գործողությունները համաձայնեցված են «Հայաստան» խմբակցության հետ. «Երբեւէ չի եղել Հայաստանում խորհրդարանական ընդդիմություն, որ այսքան սինխրոն է աշխատում: Մենք իրար հետ համագործակցված ենք աշխատում: Սա պյքարի մեր հատվածն է, «Հայաստան» դաշինքը կիրականացնի իր մասը եւ ինչ-որ պահի մենք կմիանանք»:

Ավելի վաղ NEWS.am-ը հայտնել էր, որ «Պատիվ ունեմ» խմբակցության ղեկավար Արթուր Վանեցյանն ապրիլի 17-ին, Ազատության հրապարակում հայտարարել էր անժամկետ բողոքի ակցիաների մեկնարկի մասին: Մինչ այդ Ազատության հրապարակում նստացույց էր սկսել «Սեւ հովազ» ջոկատի հրամանատար, արցախյան 44-օրյա պատերազմում զոհված Արցախի հերոս Ռուստամ Գասպարյանի եղբայրը` Սերոբ Գասպարյանը։

Ավելի ուշ 44-օրյա պատերազմի մասնակիցներ Նվեր Կիրակոսյանն ու Արթուր Ավագյանը հայտարարել էին անժամկետ հացադուլի մասին։