Նախընտրելի
ԱՄՆ նախագահ Ջո Բայդենը հինգշաբթի Կոնգրեսից նոր լիազորություններ կխնդրի ռուս օլիգարխների ակտիվների վրա կալանք դնելու եւ վերապրոֆիլավորման համար նոր ֆինանսավորման խնդրանքի շրջանակներում՝ ռուսական ներխուժումից Ուկրաինային պաշտպանվել օգնելու համար, հաղորդում է AP-ն:
Սպիտակ տանն իր ելույթի ժամանակ Բայդենը պաշտոնապես միլիարդավոր դոլարների լրացուցիչ ամերիկյան ծախսեր կխնդրի, որոնք նախատեսված են Ուկրաինայի զինված ուժերի համալրման, տնտեսության ամրապնդման եւ երկու ամիս առաջ Ռուսաստանի ներխուժումից փախած միլիոնավոր փախստականներին աջակցելու համար:
Նա նաեւ նոր լիազորությունների կհասնի Կոնգրեսից՝ Ռուսաստանի կառավարության եւ «դրանից օգուտ քաղողների դեմ պատժամիջոցների ուժեղացման համար», հայտնել են Սպիտակ տանը:
Բայդենը խնդրում է օրենսդիրներին քրեականացնել «Ռուսաստանի կառավարության հետ կոռուպցիոն գործարքներից գիտակցաբար կամ կանխամտածված ստացված եկամուտները», կրկնապատկել օտարերկրյա փողերի լվացման հանցագործությունների վաղեմության ժամկետը մինչեւ 10 տարի, եւ ընդլայնել «ռեկետի» սահմանումն ԱՄՆ օրենսդրության մեջ՝ ներառելով պատժամիջոցները շրջանցելու փորձերը:
ԱՄՆ ֆինանսների նախարար Ջանեթ Յելենն ավելի վաղ հայտարարել էր, որ նման գործողության արտոնման համար կպահանջվի Կոնգրեսի որոշումը:
