նախընտրելի դարձնելՈւկրաինայի մայրաքաղաք Կիեւում զանգվածային անկարգություններ են սկսվել: Նախկին վարչապետ Յուլյա Տիմոշենկոյի կողմնակիցները ճեղքել են Պեչերսկի շրջանային դատարանի շուրջ ոստիկանական շղթան, սակայն իրավապահներին հաջողվել է նրանց հետ մղել:
Նշվում է, որ ակցիային մասնակցում է ավելի քան 1500 մարդ: Տիմոշենկոյի կողմնակիցները հնչեցրել են քաղաքական կարգախոսներ, մասնավորապես պահանջել են իմպիչմենթ հայտարարել երկրի նախագահ Վիկտոր Յանուկովիչին:
Ոստիկանությունն սկսել է հանրահավաքի մասնակիցների ձերբակալությունները, ցուցարարներն էլ ոստիկանների վրա շշեր են նետել:
Ինչպես ավելի վաղ հայտարարել էր NEWS.am-ը, Կիեւի Պեչերսկի շրջանային դատարանը հրաժարվել էր կալանքից ազատել նախկին վարչապետին: Խափանման միջոցը փոխելու մասին նրա փաստաբանի միջնորդությունը օգոստոսի 8-ին մերժվել է:
Յուլյա Տիմոշենկոն մեղադրվում է 2009 թ-ին Ռուսաստանի հետ գազային պայմանագրեր կնքելու ժամանակ լիազորությունները գերազանցելու մեջ: Դատական գործն սկսվել է հունիսի 24-ին:
