Նախընտրելի
Իրաքը, Լիբիան, Մալայզիան եւ Թուրքիան միացել են Հնդկաստանի դեմ բողոքող մի շարք մահմեդական երկրներին՝ բողոքելով Մուհամմեդ մարգարեի մասին երկրի իշխող Հնդկական ժողովրդական կուսակցության նախկին ներկայացուցիչ Նիպուր Շարմայի հայտարարությունների դեմ։
Ինչպես հայտնում է Times of India թերթը, Իրաքի եւ Մալայզիայի արտաքին գործերի նախարարությունները բողոքի ակցիա են իրականացրել այդ երկրներում Հնդկաստանի դեսպանների դեմ: Թուրքիայի իշխող «Արդարություն եւ զարգացում» կուսակցության պաշտոնական ներկայացուցիչն ասել է, որ «Հնդկաստանը պետք է քայլեր ձեռնարկի իսլամաֆոբիայի աճի դեմ պայքարելու եւ մահմեդականների կրոնական ազատության ամրապնդման համար»: Լիբիայի արտաքին գործերի նախարարությունը դատապարտել է Շարմայի վիրավորական արտահայտությունները Մուհամմեդ մարգարեի հասցեին եւ կրոնական հանդուրժողականության, բռնությունից եւ ատելությունից հրաժարվելու կոչ է արել։
Երկուշաբթի Աֆղանստանը, Բահրեյնը, Ինդոնեզիան, Հորդանանը, Մալդիվները, ԱՄԷ-ն, Օմանը եւ Սաուդյան Արաբիան Հնդկաստանին կոչ են արել հարգել բոլոր հավատացյալների կրոնական զգացմունքները: Արձագանքելով այս երկրների հայտարարություններին՝ Հնդկաստանի ԱԳՆ-ն ընդգծել է, որ «հանրապետության կառավարությունը բարձրագույն հարգանք է ցուցաբերում բոլոր կրոնների նկատմամբ»։
Հնդկաստանի արդյունաբերության եւ առեւտրի նախարար Պիյուշ Գոյալը հայտարարել է, որ Մուհամմեդին վիրավորելու հետ կապված աղմուկը չի փչացրել Հնդկաստանի հարաբերությունները մահմեդական երկրների հետ:
